'बहुमत खाका सरकार हिलेत माओवादीयात हाथ्या'
उपप्रधानमन्त्री नापं भौतिक योजना व निर्माणमन्त्री विजयकुमार गच्छदारं एकीकृत नेकपा (माओवादी)यात बहुमत खाका सरकार हिलेत हाथ्या बियादीगु दु ।
शुक्रवाः इटहरीलय् थारु कल्याणकारिणी सभा सुनसरीया खुक्वःगु जिल्ला अधिवेशनया उल्लेज्या यानादिसें वयेकलं माओवादीं संसदय् बहुमत ह्येफुसाः एक मिनेट नं सरकारय् मच्वनेगु धयादिल । वयेकलं माओवादीं आन्दोलन यानाः देय्यात द्वन्द्व व मुठभेड पाखे यंकूगु द्वपं बियादिसें सरकार हिलेगु खसाः विधिसम्मत तरिकां प्रस्तुत जुइत माओवादीयात सुझाव बियादिल ।
अथेहे वयेकलं अल्पमतं बहुमतया सः दबे यायेत स्वयाः माओवादीं देशया विकास व संविधान निर्माण यायेगु ज्याय् पंग थंगु धयादिल । नेपाली जनताया भावना विपरित वनीपिंत जनतां हे ध्याकूने छ्वइगु दाबी नं वयेकलं यानादिल ।
बजेट पारित जुइमबिया देशय् उत्पन्न जूगु दक्वं दोषया जिम्मेवारी माओवादीं कायेमाःगु धयादिसें मन्त्री गच्छदारं जर्वरजस्ती यानाः संसदयात बन्धक दयेकातसाः उकीया विरुद्ध कडा पलाः ल्ह्वनेत सरकार बाध्य जुइगु ख्याच्वः बियादिल ।
