नेपाः पार्टीं समर्थन लित काल
येँ (सन्ध्या टाइम्स)/नेपाः राष्ट्रिय पार्टीं वर्तमान माधव नेपालया सरकारयात बियातःगु समर्थन लित काःगु दु। थौंकन्हय् जुयाच्वंगु २२ दलया बैठकय् नेपाः राष्ट्रिय पार्टीयात सःता महयेधुंकूगु कारणं थ्व सरकारं याइगु छुं नं कथंया ज्याझ्वलय् थःपिं सहभागी मजुइगु खँ उगु पार्टीया नायः डा. केशवमान शाक्यं कनादीगु दु ।
संवैधानिक समितिया अध्यक्ष पदया निंतिं जूगु चुनावय् कांग्रेसया निलाम्बर आचार्ययात समर्थन मयासे नेपाः पार्टीं माओवादीया नारायणकाजी श्रेष्ठयात समर्थन यायेवं सरकार व नेपाः पार्टीया स्वापू त्वाःदःगु खः। उगु घटना लिपा सरकार समर्थक दलतय् बैठकय् नेपाः पार्टीयात ब्वनापौ छ्वया हयेगु बन्द जूगु खः ।
आः नेपाः पार्टीं सरकारयात बियातयागु समर्थन लित कयागु औपचारिक घोषणा यायेगु लागिं आइतवाः केन्द्रीय दुजःतय् विस्तारित बैठक सःतूगु दु ।
