भचा च्वय् क्वय् जुइफु: खनाल
येँ (सन्ध्या टाइम्स)/ भारत भ्रमणय् वनाच्वंम्ह सत्तारुढ पार्टी नेकपा (एमाले) या अध्यक्ष झलनाथ खनालं थः नेपाः लिहां वयेवं वर्तमान सत्ताया गठबन्धनय् छुं 'च्वय् क्वय्' जुइफु धयादीगु दु ।
म्हिगः न्हूदिल्लीइ नेपाली पत्रकारतलिसे खँ ल्हासें अध्यक्ष खनालं थ्व खँ धयादीगु खः ।
नेपालय् सकलें दुगु राष्ट्रिय सरकार वःसा जिउ धइगु भारतया इच्छा दुसां उकिया नेतृत्व थ्वं हे यायेमाः धकाः भारतं आग्रह धाःसा मयाःगु खँ नं अध्यक्ष खनालं कनादिल ।
आः तकया भेट लिपा थः नेपाः लिहां वयेधुंकाः वर्तमान गठबन्धन भंग मजूसां उकी छुं भचा 'च्वय् क्वय्' धाःसा जुइफुगु खँ वय्कलं कनादीगु खः ।
भाजु खनालं थौं मेपिं नं भारतीय नेतातय्त नाप लाइगु ज्याझ्वः दु। सकलें नेतात नापलाये धुंकाः नं भारतीय प्रधानमन्त्री मनमोहन सिंहं धाःसा वय्कःयात नापलायेगु ई अझं मबिउनिगु खँ सीदुगु दु। खनाल भ्रमण क्वचायेकाः आइतवाः नेपाः लिहां वइगु ग्वसाः दु ।
