कोशी पीडितयात वःगु दां हिनामिना
येँ (सन्ध्या टाइम्स)/कोशी खुसिबालं पीडितया नामय् गैरसरकारी संस्थातय्सं लाखौं तका दां हिनामिना याःगु खँ पिहां वयेवं कोशी पीडितया व्यवस्थापनया निंतिं स्वनातःगु सप्तकोशी बाढी पीडित सञ्जालं विरोध यासें ज्या ठप्प यायेगु ख्याच्वः बिउगु दु ।
कोशी खुसिबालं पीडित क्षेत्रय् ज्या यायेत वःगु फेसवार्ड धइगु संस्थां पीडितया निंतिं धकाः ५२ लाख तका दां उगु क्षेत्रया निंतिं हःगु खःसां नं झिगू लाख स्वयां अप्वः दां हिनामिना याःगु द्वपं बिसें सञ्जालं आन्दोलन यायेगु ख्याच्वः बिउगु खः ।
सञ्जालं उलिमछि ध्यबा हिनामिना जुइधुंकाः नं अनुगमन मयाः धासें फेसवार्ड संस्थायात अनं चीकेगु तयारी नं यानाच्वंगु दु ।
सञ्जालं अन दुगु हुडेप नेपाल, चौतर्फी नेपाल, उप्का नेपाल, मेडेप, फेसवार्ग, डिप्रोक्स व ओरेक नेपाल लगायतया संस्थातय्सं ज्या यानाच्वंसां नं उमिसं वास्तविक पीडितयात ग्वाहालि मयासे दां हिनामिना यानाच्वंगु द्वपं नं बिउगु दु।
कोशी पीडितया नामय् उगु संस्थातय्सं गुलि दां हःगु दु धइगु तकं मसिउनिगु खँ नं सञ्जालं धाःगु दु ।
