नेपाल भारत सुरक्षा मुँज्या
नेपाल-भारत गृह छ्याँज्ये स्तरीय सुरक्षा मुँज्या थनिनिसें येँ शुरु जूगु दु । कन्हय् तक न्ह्याइगु मुँज्याय् भारतीय गृह छ्याँज्ये जीके पिली नापं झिंछम्ह दुजः दुगु पुचलं ब्वति कयाच्वंगु दुसा: नेपा:या पुचलया नेतृत्व गृह छ्याँज्ये डा. गोविन्द कुसुमं यानादीगु दु ।
मुँज्याय् नेपाली पक्षं सीमापार अपराधयात मू एजेन्डा दयेकेगु खँ धाःगु दु । भारतीय पक्षं धाःसा सुपुर्दगी सन्धि व आपराधिक पुचःया ज्याखँया बिषयसं थःथवय् कानुनी ग्वाहालि सम्बन्धी सम्झौता जुइमाःगु प्रस्ताव ज्वनावःगु दु । नापं भारतं सुरक्षाया हुनि क्यनाः त्रिभुवन अन्तर्राष्ट्रिय विमानस्थलय् ए.एस मार्सल तयेदयेमाःगु नापंया बिषयसं नं सहलह यायेमाःगु प्रस्ताव तःगु दु ।
स्वंगूगु देय्या अपराधी तयेत तकं निगू देय् दथुइ सुपर्दगी यायेगु प्रावधान नापंया प्रस्तावित सुपर्दगी सन्धिइ थ्वसिवें न्ह्यः निगू देय्या गृह छ्याँज्ये स्तरय् प्रारम्भिक ल्हाःचिं तयेधुंकूगु दु । गृहमन्त्रीस्तरय् ल्हाःचिं तयेधुनेवं सन्धि लागू जुइ । वंगु अगष्टय् प्रधानमन्त्री माधवकुमार नेपालया भारत भ्रमणया इलय् ल्ह्वंगु सुरक्षु च्यूताया सम्बोधन यायेत गृह छ्याँज्ये स्तरीय मुँज्या च्वनेगु क्वःछ्यूगु खः ।
