स्वायत्त गणराज्य घोषणाया ज्याझ्वः स्थगित : दाहाल
एकिकृत नेकपा (माओवादीं) न्ह्याकूगु आन्दोलनया ज्याझ्वः अन्तर्गत कार्तिक २३ गते यायेगु धाःगु स्वायत्त गणराज्य घोषणाया ज्याझ्वः स्थगित या:गु दु ।
फुक्क पक्षं स्वायत्त गणराज्य घोषणाया ज्याझ्वः मयायेत छ्याता ब्यूगुलिं ज्याझ्वः स्थगित यानागु जानकारी माओवादी नायः पुष्पकमल दाहालं थौं इलामय् बियादीगु दु । नायः दाहालं माओवादीया नेतृत्वय् राष्ट्रिय सरकार गठन व राष्ट्रपतिया पलाः भिंकल धाःसा जक राजनीतिक निकास पिहाँवइगु धयादिल । माओवादीया आन्दोलनं सरकारयात सही लँपुइ यंकेत ग्वाहालि जुयाच्वंगु धयादिसें वय्कलं आन्दोलनया हुनिं सरकार क्वमिलु जुयागु दाबी तकं यानादिल ।
नायः दाहालं राष्ट्रसंघं राष्ट्रिय सहमतिया सरकार गठन यायेत याःगु आव्हान राष्ट्रिय हितय् जूगु प्रतिक्रिया बियादिल । क्वःछिनातःगु इलय् न्हूगु संविधान तयार मजुल धाःसा छु जुइ धैगु स्वयां आन्दोलनयात गुकथं सशक्त यायेगु धैगु खँय् माओवादी केन्द्रीत जुयाच्वंगु वय्कलं धयादिल ।
माओवादीं कार्तिक २४ गतेया निंतिं क्वःछिनातःगु हवाई नाकाबन्दीया ज्याझ्वः थ्वसिवें न्ह्यः हे लितकाये धुंकूगु दु ।
