राष्ट्रसंघं नेपाःया आन्तरिक मामिलाय् हस्तक्षेप याःगु नीनिगू दलया ठहर
सरकारयात समर्थन यानाच्वंगु नीनिगू दलं राष्ट्रसंघं नेपाःया आन्तरिक मामिलाय् हस्तक्षेप याःगु ठहर याःगु दु ।
सिंहदरवारय् दुगु प्रधानमन्त्रीया ज्याकूथीइ बिहीवाः च्वंगू सत्ता गठबन्धन नीनिगू दलया बैठकं राष्ट्रसंघया महासचिव वान की मुनं नकतिनि सुरक्षा परिषदय् न्ह्यब्वयादीगु प्रतिवदेनय् न्ह्यथनातःगु खँ पाखें नेपाःया आन्तरिक मामिलाय् हस्तक्षेप जूगु धासें आवश्यक जुसा: थुकीया बारे राष्ट्रसंघ समक्ष लिखित प्रस्ताव छ्वयेगु निर्णय याःगु दु ।
राष्ट्रसंघया महासचिव मुनं छुं ई न्ह्यः राष्ट्रसंघया सुरक्षा परिषदय् नेपालय् राष्ट्रिय सहमतिया सरकार निर्माण जुइमाःगु खँ न्ह्यथंसें थःगु प्रतिवेदन न्ह्यब्वयादीगु खः ।
नीगूगु दलय् ब्वति कयादिम्ह कांग्रेस संसदीय दलया नेता रामचन्द्र पौडेलं राष्ट्रसंघया महासचिवं माओवादीं धयाच्वंगु थें हे राष्ट्रिय सहमतिया सरकार निर्माण जुइमाःगु बिचाः प्वंकूगु धयादिसें नेपालय् छु यायेमाः, छु यायेम्वः थ्व नेपाःया आन्तरिक मामिला जूगु कनादिल ।
अथेहे बैठकय् राजनीतिक समस्या समाधानया बारे नं सहलह जूगु खसाः सहमतिया निंतिं वार्ताय् वयेत आन्दोलनरत एनेकपा (माओवादी)यात नं इनाप याःगु दु ।
बैठकं संसदय् निरन्तर जुयाच्वंगु अवरोधया कारणं बजेट पारित जुइमफुगु अवस्थां देशय् गम्भीर लिच्वः लायेत्यंगु धासें बहुमतया कदर यासें संसदयात सुचारु यायेत सभामुखयात इनाप यायेगु निर्णय नं याःगु दु ।
