'प्रतिक्रियावादीतय्सं शान्ति प्रकृया स्यंकेत स्वयाच्वंगु दु'
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' देय् दुने व पिनेया प्रतिक्रियावादीतसं नेपाःया शान्ति प्रकृया स्यंकेत स्वयाच्वंगु द्वपं बियादीगु दु ।
बिहीवाः लिम्बुवान राज्य समितिं इमालय् या:गु आमसभायात सम्बोधन यानादिसें वयेकलं विदेशी प्रतिक्रियावादी शक्तितय् ल्यूल्यू वनाः नेपाःया गुलिखें राजनीतिक दलत नं शान्ति प्रकृया स्यंकेत स्वयाच्वंगु धयादिल । वयेकलं गुनं शाक्तियात नेपाःया शान्ति प्रकृया स्यंकेमबीगु धयादिसें थःपिं शान्ति प्रकृया सफल यायेत इमान्दारी पूर्वक लगेजुयाच्वनाःगु धयादिल ।
अध्यक्ष प्रचण्डं माओवादीं न्ह्याकाच्वंगु आन्दोलन शान्तिपूर्ण जुयाच्वंगु धयादिसें थुकीयात दमन मयायेत सरकारयात ख्याच्वः बियादिल । वयेकलं सरकारं सेना परिचालन यायेत स्वयाच्वंगु धयादिसें अज्याःगु ज्या गुनं हालतं सफल मजुइगु दाबी यानादिल । माओवादीं न्ह्याकूगु आन्दोलय् लखौं जनतया समर्थ जूगु धयादिसें थुकीयात दमन यायेत स्वःसा उकीया लिच्वः दुर्भाग्यपूर्ण जुइगु धयादिल ।
सभाय् न्ववानादिसें माओवादी सचिव सिपि गजुरेलं नेपालय् अझ नं क्रान्ति पूमवंगु धयादिसें उकीया निंतिं आन्दोलन आवश्यक जूगु धयादिल । वयेकलं माओवादीं न्ह्याकूगु आन्दोलनयात प्रशस्त जनसमर्थन दुगुलिं थ्व सफल जुया तुं त्वतीगु दाबी यानादिल ।
