संविधानया प्रस्तावनाय् सहलह
येँ (सन्ध्या टाइम्स)/ संविधानसभाया दकलय् महत्वपूर्ण संवैधानिक समितिया बैठक थौं सुथय् च्वंगु दु ।
संविधान बारे दफावार सहलह क्वचायेवं थनिंनिसें संविधानया प्रस्तावनायात कयाः सहलह ब्याकूगु खः।
सहलहया झ्वलय् माओवादी उपाध्यक्ष डा. बाबुराम भट्टराईनं वर्गीय, जातीय, क्षेत्रीय, लैंगिक व आत्मनिर्णयया अधिकारयात संविधानया प्रस्तावनाय् हे दुथ्याकेमाःगु सुझाव बियादीगु दु। वय्कलं संविधानया नां 'जनताया संघीय गणतन्त्र नेपालया संविधान' धकाः तयेमाःगु प्रस्ताव नं यानादीगु दु ।
अथे हे कांग्रेसया उपसभापति रामचन्द्र पौडेलं नेपालय् न्ह्याःगु आन्दोलनयात संवोधन जुइ कथंया व्यहोरा प्रस्तावनाय् दुथ्याकेमाःगु सुझाव बियादीगु खः। वय्कलं बहुदलीय समाजया खँयात नं प्रस्तावनाय् दुथ्याकेत सुझाव बियादिल ।
सहलहया झ्वलय् वय्कःपिंसं संविधानया प्रस्तावनाय् दोहोर अर्थ लगे जुइ कथंया शब्द मतसे सकस्यां थुइगु भासं जुइमाःगु सुझाव नं बिउगु खः। प्रस्तावनाया मस्यौदाय् विवाद जारी दु ।
