नेपाःया समर्थनय् भारतीय बजाः बन्द
येँ (सन्ध्या टाइम्स)/विराटनगर लिक्क लाःगु भारतीय नाका रुपेडियाय् एसएसबीया जवानतय्सं दुर्व्यवहार याःगु धासें थौं स्थानीय व्यापारीतय्सं रुपेडिया बजाः बन्द याःगु दु।
आपालं नेपाःमितय्सं थःत माःगु सामान न्यायेत भारतीय बजारय् वनेगु यानाच्वंगु दुसा नेपाःमितय्त भारतीय जवानतय्सं दुःख बिउगु ज्या यानाच्वंगु धासें भारतीय व्यापारीतय्सं एसएसबीया विरोधय् थ्व बन्द याःगु खः।
भारतीय व्यापारीतय्सं एसएसबीया नेपाःमितय्त दुःख बीगु ज्या तत्काल दिकेत नं इनाप याःगु दु ।
एसएसबीया गैर जिम्मेवारी ज्या तत्काल मदिकल धाःसा थप आन्दोलनया घोषणा यायेगु खँ नं भारतीय व्यापारीतय्सं धाःगु दु ।
नेपाःया सिमानाय् च्वनाच्वंपिं भारतीय जवानतय्सं नेपाःमितय्सं न्यानाहःगु सामान लाका कायेगु, सामान हयेके मबीगु आदि ज्या यानाच्वंगु खः। आपालं नेपाःमित भारतय् बजारय् दंक सामान न्याये दइगु जूगुलिं भारतीय बजारय् आकर्षण जुयाच्वंगु दु ।
