नेप्से हाकनं १० अंकं थहां वन
येँ (सन्ध्या टाइम्स)/नेपाल स्टक एक्सचेन्जय् जुयाच्वंगु शेयर कारोबारं ताः ई तक दिपाः हे मकासे कुहां वयाच्वंगु नेप्से परिसुचक आः हाकनं थहां वनेगु क्रमं तिब्रता वःगु दु। थुगु वाःया न्हापांगु न्हि छन्हु त्वःता थहां वंगु नेप्से परिसुचक म्हिगः छन्हुं हे ९ दशमलव ९७ अंकं थहां वनाः ५८१ दशमलव ५५ अंकय् थ्यंगु दु। अथे हे सेन्सेटिभ नं २ दशमलव ५९ अंकं थहां वन। उखे फ्लोट नं शुन्य दशमलव ८ अंकं थहां वंगु दु ।
बजाः चालेवं हे मेमेगु इलय् नेप्से कुहां वनीगु खःसा म्हिगःया कारोबारय् नेप्से शुरुं निसें हे थहां वनेगु क्रमं गति काल। गुगु क्रम कारोबारया अन्त तकं कायम जुयाच्वंगु खः। म्हिगःया कारोबारं वाणिज्य समुहया एभरेष्ट बैंक छगूया जक दकलय् अप्वः १११/- तका दां कुहां वंगु दुसा मेखे नेप्सेय् अप्वः प्रभाव लाकीगु वाणिज्य समुहया नविल बैंकया १०७/-, म्हिगः निसें जक शेयर कारोबार शुरु जूगु प्राइम कमर्सियल व लक्ष्मी बैंकया ४८/-, स्टायण्डर्डया ४०/-, एनआईसीया ४४/- एसबीआईया ३५/- तकाया लिसें अप्वः थें बैंकया शेयर भाः थहां वनेवं नेप्से नं थहां वंगु खः ।
प्रमुख बैंकया शेयर भाः थहां वनेवं वाणिज्य समुह ११ दशमलव ४७ अंकं थहां वनाः ५५९ दशमलव शुन्य ४ अंकय् थ्यन। व्यापार समुह ४ दशमलव ८८ अंकं थहां वनाः २६६ दशमलव शुन्य ९ अंकय् थ्यंगु दु। विकास बैंक समुहया उपसुचक नं ४ दशमलव ५७ अंकं थहां वनाः ६३७ दशमलव ९१ अंकय् थ्यंगु दुसा जलविद्युत समुह नं म्हिगःया कारोबारय् २ दशमलव ४६ अंकं थहां वनाः ८१५ दशमलव ८८ अंकय् थ्यन। मेखे फाइनान्स समुह छगू जक म्हिगः शुन्य दशमलव २४ अंकं कुहां वनाः ६०७ दशमलव २६ अंकय् थ्यंगु दु ।
खतुं थुगु बैंक बाहेकं नं मेमेगु विकास बैंकया नं शेयर भाः थहां वनेवं थुगु समुहया उपसुचक शुन्य दशमलव ५४ अंकं थहां वनाः ६३३ दशमलव ३४ अंकय् थ्यंगु दु। लिसें जलविद्युत समुह ७ दशमलव १२ अंकं थहां वनाः ८१३ दशमलव ४२ अंकय् थ्यंगु दु फाइनान्स समुह ३ दशमलव १७ अंकं थहां वनाः ६०७ दशमलव ५ अंकय् थ्यन। वीमा समुह नं शुन्य दशमलव १२ अंकं थहां वनाः ६०६ दशमलव ४७ अंकय् थ्यंगु दु ।
म्हिगः ख्वीप्यंगू कम्पनीया ग्वीगुंद्वः व पीगु कित्ता शेयर न्याये-मी जुयाः खुगू करोड चय्स्वंगू लाख स्वीछद्वः तका दांया कारोबार जूगु दु। लक्ष्मी बैंक लिमिटेडं कारोबार कम्पनी मध्ये दांया ल्याखं दकलय् अप्वः निगू करोड स्वीछगू लाख ख्वीखुद्वः तका दांया कारोबार याःगु दु ।
म्हिगः निसें जक नेप्सेय् शेयर कारोबार जूगु प्राइम कमर्सियल बैंकं दकलय् अप्वः कमे याःगु दुसा मेखे म्हिगः निसें हे शेयर कारोबार शुरु जूगु भिवोर विकास बैंकं दकलय् अप्वः द्यापं फयेमाःगु दु ।
