कांग्रेस आः सामूहिक नेतृत्वय्
नेपाली कांग्रेसया महासमितिया बैठकं सभापति गिरिजाप्रसाद कोइरालाया अडान विपरित सामूहिक नेतृत्वय् वनेगु निर्णय याःगु दु । प्यन्हु न्ह्यः निसें न्ह्यानाच्वंगु सहलह लिपाः पार्टी नेतृत्व सामूहिक जुइ कथं विधान मस्यौदा पारित जूगु खः ।
झिंन्यादँ तक सर्वशक्तिमान जुयादीम्ह सभापति कोइराला थ्व बैठकया निर्णय नापं पार्टी दुने कमजोर सावित जुयादीगु दु । सभापति कोइरालां लिप्पांगु ई तक नं सभापतिया अधिकार कटौति मयासें सभापतीय प्रणालीया पक्षय् अडान कयादीगु खः । सभापति कोइरालायात हे समर्थन यासें सभापतीय प्रणालीया वकालत यानाच्वनादिम्ह कार्यवहाक सभापति सुशिल कोइराला महासमितिया बैठकय् दुई तिहाई स्वयां अप्व दुजःतय्सं सामूहिक नेतृत्वया पक्षय् अडान कायेवं ल्यूने वनेत बाध्य जुयादीगु खः ।
न्हापा पदाधिकारी सहित न्यय्गू प्रतिशत दुजः मनोनित यायेगु सभापतिया अधिकारयात पारित विधानं कटौति याःगु दु । न्हूगु विधान कथं छम्ह महामन्त्री, कोषध्यक्ष सहित न्ह्यन्यागू प्रतिशत दुजःत निर्वाचित जुइसाः छम्ह उपसभापति, छम्ह महामन्त्री व सहमहामन्त्री नापं नीन्यागू प्रतिशत दुजःत सभापितं मनोनित याये दइगु अधिकारया व्यवस्था याःगु दु ।
म्हासमिति बैठकया लिप्पांगु न्हि कांग्रेस वरिष्ठ नेता शेरबहादुर देउवा, रामचन्द्र पौडेल लगायत नेतात सभापतिया अधिकार कटौति यायेत सहमत जयादीगु खः । पार्टी सभापति कोइराला नापया खँल्हाबंला लिपा जूगु सहलहलय् नेतात दथुइ उगु सहमति जूगु खः ।
