सुरक्षाया माग यासें पोखराया मणिपाल अस्पताल बन्द
असुरक्षाया कारण क्यंसें चिकित्सकतय्सं ज्या याये त्वतेवं पोखरय् च्वंगु मणिपाल शिक्षण अस्पताल बन्द जूगु दु ।
मंगलवाः छम्ह विरामी सीवं सिम्हेसिया छेँजः पाखें चिकित्सकया लापर्वाहीया कारणं सीगु धासें चिकित्सकयात हातपात यायेवं बुधवाः चिकित्सकतय्सं इमर्जेन्सी सहित दक्वं ओपीडी सेवा बन्द याःगु दु । अस्पताल दुने हे हातपात जुइवं ज्या यायेगु वातावरण मदुगु धासें चिकित्सकतय्सं अस्पताल पिहांवंगु खः ।
छाती स्याःगु उपचारया निंतिं अस्पतालय् भर्ना जुम्ह लेखनाथ नगरपालिकाया तिलक खनाल मंगलवाः सीवं अस्पतल तनावग्रस्त जूगु खः । अस्पतालं खनालयात चिकित्सकतय्सं लापर्वाही मयाःगु दावी याःगु दु ।
सिम्ह खनालया छेँजःपिंसं धाःसाः दोषी चिकित्सकयात कार्वाही यायेमाःगु, सिम्ह खनालया जहानयात जागिर बीमाःगु, काय्-म्हाय्यात ब्वंकेगु व्यवस्था यायेमाःगु माग याःगु दु । अस्पतालया व्यवस्थापन व सिम्ह खनालया छेजः दथुइ वार्ता जुइगु धाःसां आः तक वार्ता जुइफुगु मदुनी ।
