तारा एयरया विमान दुर्घटना

सोलखुम्बुया स्याङबोचे विमानस्थलय् बुधवाः तारा एयरया पिलाटस पोर्टस विमान दुर्घटनाय् लाःगु दु । सुथय् ८:४५ बजे जूगु दुर्घटनाय् विमानय् क्षति जुसां मानवीय क्षति धाःसाः मजूगु खँ एयरलाईन्सं धाःगु दु ।

तारा एयरया उगु नाइन एआइयू जहाजं न्याम्ह विदेशी पर्यटक ज्वनाः येँ वयेत्यंगु ईलय् दुर्घटना जूगु खः । निम्ह चालक दुगु विमान विमानस्थलया धावनमार्गय् गुडे जुयाच्वंगु ईलय् विमान अनियन्त्रित जुयाः दुर्घटना जूगु खः । विमान दुर्घटना जुइवं तत्काल विमान दुने दुपिं यात्रु व चालकया उद्धार याःगु खः ।

दुर्घटनाय् लानाः विमानया चक्का, ल्यूनेया ब्व व जवया पंखाय् क्षति जूगु दु । लत्याः न्ह्यः जक नियमित उडान शुरु याःगु तारा एयरया उगु विमान दुर्घटनाया कारण सिकेमफुनीसां प्राविधिक खराबीया कारणं दुर्घटना जूगु अनुमान याःगु दु ।