खाडीइ ज्या मदुपिं नेपाःया ज्यामित
नेपालय् लखौं तका दां फुकाः खाडी लागाय् ज्या याः वंपिं नेपाली ज्यामित आः अन ज्या मदयाः लिहां वयेगु क्रम शुरु जूगु दु । खास यानाः कतारय् ज्या याईपं नेपाःमितय्त अनया थुवाःतय्सं आःयात ज्या मदु धकाः लछिया थप तलब ज्वंकाः लित छ्वयाहःगु दु । उपिं आः अनया नेपाली राजदूतावासय् शरण कयाः च्वनाच्वंगु समाचार वःगु दु । नेपालं छुं ई न्ह्यः तिनि उखे ज्या याः वंपिं थ्व नेपाली श्रमिकत स्वला प्यलाया दुने हे ज्या मदयेकाः लिहां वयेमाःगुलिं उमिके विमानया टिकट न्यायेगु तकं अवस्था मदयाच्वंगु दु । उमिसं नेपाः वयाः थम्हं कयातःगु त्यासा पुलेगु ला अझ तापाःगु हे खँ तिनि । उमिगु बारे नेपाः सरकारं बिचाः यायेमाःगु अतिकं आवश्यक दु ।
थौंकन्हय् विश्वन्यंकं वयाच्वंगु आर्थिक मन्दीया कारणं यानाः खाडीया नेपाःमितय्त थ्व संकट वःगु खः । खाडीइ थौंकन्हय् अप्वः यानाः निर्माण ज्या न्ह्याकाच्वंपिं धईपं अमेरिकी व युरोपीय कम्पनीत खः । विश्व आर्थिक मन्दीं यानाः थ्व कम्पनीत खाडीइ थःपिंसं न्ह्याकाच्वंगु ज्या दिकेत बाध्य जूगु दु । निर्माणया ज्या दिउगुलिं अन लेबोर ज्या याईपं फुक्क हे ज्यामित बेरोजगार जू वन । उकिया मार नेपाःमि ज्यामितय्त नं लात । खाडी लगायतया देशय् ज्या याईपं नेपाःमितय्सं छ्वयाइगु रेमिटेन्सय् हे देय्या अर्थतन्त्र लिधं वनेधुंकूगु कारणं उमित लाइगु छुं नं कथंया लिच्वः धइगु नेपाःया अर्थतन्त्रय् हे लाः वनीगु लिच्वः खः । उकिं थ्व विषययात नेपालं सामान्य रुपं काये मजिउगु अवस्था दु । विश्व आर्थिक मन्दीया लिच्वः नेपाःयात तप्यंक मलाःसां थुकथं धाःसा बांमलाक हे लानाच्वंगु दु । थ्व संकटयात म्हो यायेगु पाखे पलाः छीमाःगु दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
