नेवाः-ताम्सालिङ प्रदेश विवाद
येँ (सन्ध्या टाइम्स)/माओवादीपाखें थ्वहे वइगु कार्तिक २३ गते यायेत्यंगु नेवाः स्वायत्त गणराज्य घोषणाया ज्याझ्वः विवादय् लाःगु दु। वकुन्हु हे माओवादीपाखें ताम्सालिङ्ग स्वायत्त गणराज्य नं घोषणा याइगु ज्याझ्वः दु तर तामाङतय्सं थःपिनि घोषणासभा भ्वँत (बनेपा) य् वयाः यायेगु धकाः ज्याझ्वः दयेकातःगु कारणं निगुलिं ज्याझ्वः विवादय् लाःगु खः। भ्वँत देय् नेवाः स्वायत्त प्रदेश दुने लाःगु थाय् खः। अज्याःगु थासय् वयाः ताम्सालिङ घोषणा यायेत्यंगु खँयात कयाः म्हिगः नेवाः स्वायत्त राज्य मंकाः संघर्ष समितिया आकस्मिक बैठक च्वन। थ्व ज्यां यानाः निगू जातीय समुदाय दथुइ कचवं ब्वलनीगु जूगुलिं ताम्सालिङ प्रदेशया घोषणा उगु भेगया नेवाःतय्सं दावी यानाच्वंगु गुगुं नं लागाय् मयायेत एनेकपा (माओवादी) यात छगू ज्ञापनपत्र नं बिउगु दु ।
सूत्रतय्सं धाः कथं माओवादीं दयेकातःगु प्रदेशया आन्तरिक नक्साय् भ्वँत, धौख्यः, पन्ति, नाला आदि लागा नेवाः प्रदेशय् हे लाका तःगु दु ।
