मातृका पुचःपाखें वीरगञ्ज बन्द
येँ (सन्ध्या टाइम्स)/ मातृका यादव समर्थित नेकपा (माओवादीं) थौं वीरगञ्ज बन्द यात। प्रहरीं ज्वनातःम्ह थः कार्यकर्ता धु्रव यादवयात त्वःतेमाःगु माग यासें थ्व बन्द याःगु खः ।
वीरगञ्ज बन्दया झ्वलय् मातृका-माओवादी कार्यकर्तातय्सं थौं सुथंनिसें अनया प्रतिमा चोक, पावरहाउस चोक लगायतया थासय् टायर च्याकाः प्रदर्शन यानाच्वंगु दु।
माओवादीं बन्द आह्वान याःगुलिं अनया कलकारखाना, यातायात, शिक्षण संस्था नं ठप्प जुयाच्वंगु दु ।
माओवादी कार्यकर्तातय्सं सोमवाः कुन्हु वीरगञ्ज भन्सार प्रमुखयात हातपात यासें ख्वालय् हाकः पाकेगु ज्या नं याःगु खः ।
माओवादी कार्यकर्ताया क्रियाकलाप विरुद्ध थौं अनया भन्सार कर्मचारीतय्सं थःपिनि ज्या ठप्प यानाच्वंगु दु। कर्मचारीं ज्या मयाःगुलिं भन्सारय् राजश्व उठे यायेगु नापं प्रभावित जूवंगु दु ।
