'भक्तपुर नाइट' तःजिक क्वचाल
ख्वप (सन्ध्या टाइम्स)/ भक्तपुर पर्यटन विकास समितिया ग्वसालय् म्हिगः सकिमना पुन्हि कुन्हु बहनी ख्वपया लाय्कुलि जूगु 'भक्तपुर नाइट' तःजिक क्वचाल। नेमकिपाया अध्यक्ष नारायणमान बिजुक्छे 'रोहितं' उगु ज्याझ्वःया उलेज्या यानादीगु खः। ज्याझ्वलय् वय्कलं स्थानीय निकाय नीस्वने फुगु जूसा पर्यटकतय्त आकर्षित यायेगु निंतिं अझ नगरपालिकां थीथी ज्याझ्वःत हये फइगु खँ कनादिल।
गुक्वःगु भक्तपुर नाइट कथं न्ह्याकूगु उगु ज्याझ्वलय् थीथी देशं वःपिं विदेशी पर्यटकतय्त नेवाः नसाज्वलंया व्यवस्था लिसें महाकाली प्याखं, देवी प्याखं, शेरसिंह प्याखं, धिमे बाजं, तामाङ सेलु व नेवाः परम्परागत प्याखंत क्यनाः न्ह्यइपुकूगु खः। दँय्दसं सकिमना पुन्हि कुन्हु याना वयाच्वंगु थुगु ज्याझ्वलय् झाःपिं विदेशीतय्त उगु ज्याझ्वः शुरु जुइ न्ह्यः टौमढी व थीथी लागाय् ब्ययातःगु हलिमलि क्यंगु खः ।
