हिउपाःमि ल्याय्म्ह पुचःपाखें हलिमलि ब्वज्या कासा
ख्वप (सन्ध्या टाइम्स)/ हिउपाःमि ल्याय्म्ह पुचःपाखें म्हीग सकिमिला पुन्हि कुन्हु ख्वपया थीथी त्वालय् बहनी ब्वयातःगु हलिमलिया थीथी सांस्कृतिक पक्षयात कयाः मूल्यांकन याःगु दु। नगरन्यंकं ब्वयातःगु थीथी हलिमलिया मूल्यांकन यायेत संगीतकार बद्रीनारायण ताम्रकार, कलाकार अगिब बनेपाली, दिलबहादुर प्रजापति व ध्रुवनारायण लिबिया नेतृत्वय् प्यंगू पुचः थीथी थासय् चाःहिउगु खः। वय्कःपिंत चन्द्रमान सुवाल, राजेन्द्र श्रेष्ठ, अच्यूत प्रजापति, मृगेन्द्रराज सुवेदी, केदारनाथ जोशी, मोहनप्रसाद प्रजापति व दिपेन्द्र बनेपालीपिंसं ग्वाहालि याःगु खः ।
हिउपाःमि ल्याय्म्ह पुचःया ग्वसालय् थगुने नं थुकथं हे त्वाः त्वालय् ब्वयातःगु हलिमलिया थीथी पक्षया मूल्यांकन यानाः सिरपाः घोषणा याःगु खः ।
थगुनेया कासाय् गाःहिटी त्वाःया पाताल गणेश भजन खलः न्हाप, टौमढी त्वाःया आकाश भैरव नौबाजा खलः लिउ व सिजः महाद्यः भजन खलः च्वःफः लियां लिउ लाःगु खः ।
