नेप्से ४ अंकं थहां वन
येँ (सन्ध्या टाइम्स)/नेपाल स्टक एक्सचेन्जय् जूगु शेयर कारोबारं थ्व वालय् छुं भचा सुधार जुयाः नेप्से परिसुचक थहां वंगु दु। स्वन्ति नखः धुनेवं निन्हु थहां वनाः वयां लिपा दिपाः हे मकासे कुहां वंगु नेप्से सोमवाः सामान्य अंकं जक थहां वंगु खःसा म्हिगः न्ह्यथनेबह जुइकथं सुधार जूगु दु। म्हिगः कारोबार शुरु जूगु बाघौतक थातं लानाच्वंगु नेप्से वयां लिपा थहां वनेगु शुरु जूगु खः। थहां कुहां जुइगु क्रमं निरन्तरता काःगु नेप्से कारोबार शुरु जूगु निघौ लिपा थहां वँवं कारोबारया अन्त तकं थहां वंगु खः ।
थुगु वाःया न्हापांगु न्हि वाणिज्य समुहया कारोबारय् वःगु उच्च १० अंकं कुहां वंगु नेप्से म्हिगःया कारोबारं धाःसा दक्वं समुहया सुचक व उपसुचक नं सुधार जुयाः थहां वंगु दु। नेप्से म्हिगः ४ दशमलव ३१ अंकं थहां वनाः ५७१ दशमलव ५८ अंकय् थ्यंगु दु। छन्हु न्ह्यः कुहां वःगु सेन्सेटिभ नं म्हिगः २ दशमलव १ अंकं व फ्लोट शुन्य दशमलव ५१ अंकं थहां वन।
म्हिगः निसें शेयर कारोबार शुरु जूगु प्राइम कमर्सियल बैंक व सनराइज बैंकया लिसें नेप्सेय् प्रभाव लाकीगु मू मू बैंकत नविल बैंकया शेयरय् प्रति कित्ता १०३/-, एभरेष्ट बैंकया शेयरय् प्रति कित्ता १०२/- व स्टायण्डर्ड चार्टर्डया शेयरय् प्रति कित्ता १००/- तकाया लिसें वाणिज्य समुहया मेमेगु बैंकया नं शेयरय् भाः थहां वनेवं वाणिज्य समुह ९ दशमलव शुन्य १ अंकं थहां वनाः ५४७ दशमलव ५७ अंकय् थ्यंगु दु। मेखे विकास बैंकया उपसुचक थहां वंगुया मू कारण धाःसा म्हिगः निसें कारोबार शुरु याःगु विकास बैंक खनेदत। खतुं थुगु बैंक बाहेकं नं मेमेगु विकास बैंकया नं शेयर भाः थहां वनेवं थुगु समुहया उपसुचक शुन्य दशमलव ५४ अंकं थहां वनाः ६३३ दशमलव ३४ अंकय् थ्यंगु दु। लिसें जलविद्युत समुह ७ दशमलव १२ अंकं थहां वनाः ८१३ दशमलव ४२ अंकय् थ्यंगु दु फाइनान्स समुह ३ दशमलव १७ अंकं थहां वनाः ६०७ दशमलव ५ अंकय् थ्यन। वीमा समुह नं शुन्य दशमलव १२ अंकं थहां वनाः ६०६ दशमलव ४७ अंकय् थ्यंगु दु ।
छखे नेप्से बुलुहँ थहां वनाच्वंगु दुसा मेखे शेयर व दांया कारोबार धाःसा कुहां वयाच्वंगु दु। छन्हु न्ह्यःया ल्याखय् म्हिगः नं शेयर व दांया कारोबार कुहां वःगु दु। म्हिगः प्यंगू करोड न्यागू लाख चय्न्याद्वः तका दांया बराबरया ख्वीच्याद्वः न्यासः व पीगु कित्ता शेयर न्याये-मी जुल। छन्हु न्ह्यः न्हय्न्हय्द्वः च्यासः व पीस्वंगू कित्ता बराबरया न्यागू करोड नीच्यागू लाख न्हय्प्यद्वः तका दांया कारोबार जूगु खः ।
