भाजु ज्ञानेन्द्र भारत वनीगु
पुलांम्ह जुजु ज्ञानेन्द्र छगू पारिवारिक भ्वजय् ब्वति कायेत भारत झाइगु जूगु दु । थुकिया निंतिं वय्कलं माःगु प्रवन्ध मिले याना बीमाल धकाः नेपाःया निंतिं भारतीय राजदूत रोकश सूदयात इनाप यानादीगु दु । छुं न्हि न्ह्यः भाजु शाहं भारतीय राजदूतयात गोप्य रुपं नापलासें थः भारतय् वनेबलय् अन भचा बांलाःगु प्रवन्ध मिले याना बीमाली धकाः आग्रह यानादीगु खः ।
सूत्रतय्सं धाः कथं भाजु ज्ञानेन्द्र शाहं थः थौंकन्हय् तसकं याकः जुयाच्वंगु अभिव्यक्ति नं राजदूत सूदयात प्वंकादीगु खः । राजदूत सूदंछिकपिनि उलिमछि कार्यकर्तात गन वन धकाः न्यंबलय् भाजु शाहं थौंकन्हय् उपिं फुक्कं माओवादी जू वनेधुंकल धकाः कनादीगु खः । (जुजुया मनूत फुक्क माओवादी जू वनेधुंकल धकाः ज्ञानेन्द्र शाहं धयादीगु थ्व रोचक प्रशंग राजदूत सूदं प्रधानमन्त्री प्रचण्डयात नं न्यंकादीधुंकूगु खँ सीदुगु दु ।)
पुलांम्ह जुजु शाह भारत वनेत्यंगुया कारण थः निनीया म्ह्याय्या इहिपा समारोहय् ब्वति कायेत खः । भारतया उडिसाय् बियातःम्ह ज्ञानेन्द्रया निनि भारती शाहया म्ह्याय् मय्जु प्रभाया इहिपा थ्वहे वइगु फागुन १६ गते जुइत्यंगु दु । उकी हे ब्वति कायेत ज्ञानेन्द्र शाह उडिसाया कालाहाण्डी धाःगु थासय् वनेत्यंगु खः ।
व्यक्तिगत ज्याय् भारत वनेत्यंम्ह खःसां वय्कःया थ्व भारत भ्रमणयात अर्थपूर्ण रुपं स्वयाच्वंगु दु ।
