हेटौंडा कपडा उद्यौग खारेज
अछाम घटना छानबिन यायेत समिति गठन
सरकारं हेटौंडाय् बन्द जुयाच्वंगु कपडा उद्योग संचालन यायेमफइगु निष्कर्ष पिकासें उकीयात खारेज यायेगु निर्णय याःगु दु ।
बुधवाः सुथय् च्वंगु मन्त्रिपरिषद्या बैठकं थंज्या:गु निर्णय याःगु खः । अथेहे मन्त्रिपरिषद्या बैठकं अछाम जिल्ला प्रहरी जयाकूया मिसा प्रहरी जवान सुन्तली धामीयात याःगु बलात्कार घटना सम्बन्धि छानबिन यायेगु निंतिं पुलाम्ह न्यायाधिक कृष्णप्रसाद बस्यालया संयोजकत्वय् स्वम्ह दुजः दुगु छानबिन समिति गठन याःगु दु ।
अथेहे बैठकय् चितवन राष्ट्रिय निकुञ्ज दुने संचालित होटलया विषयलय् थीथी समिति पाखें फरक फरक मत वःगुलिं दलत दथुइ सहलह यानाः उपयुक्त निर्णय कायेगु निर्णय याःगु दु । नापं बजेट पारित यायेगु विषयलय् नं दलत नाप सहलह यानाः सहमतिया आधारय् बजेट पारित यायेगु निर्णय याःगु दु । बैठकय् निजामती कर्मचारीया शैक्षिक योग्यता प्रमाणिकरण बारे सहलह जूगु खँ सरकारया प्रवक्ता नापं संचार मन्त्री शंकर पोखरेलं कनादिल ।
बैठकय् प्रधानमन्त्री माधवकुमार नेपालं मंगलवाः बहनी एमाले नेता केपी शर्मा ओलीया छेँय् स्वंगू प्रमुख दलया शीर्ष नेतात दथुइ जूगु सहलहया बारे मन्त्रिपरिषद्या दुजःतय्त जानकारी बियादीगु खः । सरकारं राजनीतिक गतिरोध ज्यंकेगु निंतिं राजनीतिक दलत नाप सहलह जारी यायेगु निर्णय नं याःगु दु ।
