मातृका पुचः पाखें वीरगंज बन्द
मातृका यादव संयोजक जूगु पुर्नगठित नेकपा (माओवादीं) याःगु बन्दया कारणं बुधवाः वीरगंजया जनजीवन प्रभावित जूगु दु ।
थःगु पार्टीया पर्सा जिल्ला कमिटी दुजः ध्रुव यादवयात सोमवाः प्रहरीं ज्वनायंकूगु विरोधय् पार्टीं बन्द आह्वान याःगु खः । माओवादी कार्यकर्तातय्सं सुथं निसें वीरगंजया मूमू चोकय् टायर च्याकाः प्रदर्शन यानाच्वंगु दु । उमिसं नाराबाजी यासें वीरगंजया थीथी थासय् जुलुस नं पिकाःगु दु । बन्दया कारणं अनया बजाः, शिक्षण संस्था, यातायात दक्वं ठप्प जूगु दु ।
माओवादीं यादवयात मत्वतुतल्ले थःपिसं प्रदर्शन यानाच्वनेगु व अझ सशक्त जुइगु खँ धाःगु दु । थ्वस्वयां न्ह्यः सोमवाः फर्नेस आयलया विषयलय् भन्सार ज्याकू दुने जुयाच्वंगु सहलहलय् विवाद जुइवं यादवं प्रमुख भंसार अधिकृत केवल भण्डारीयात हातपात यायेत स्वयेवं वयात सशस्त्र प्रहरीं नियन्त्रणय् काःगु खः । माओवादीं धाःसाः प्रमुख भंसार अधिकृत भण्डारीं भ्रष्टाचार याःगु द्वपं ब्यूगु दु ।
