माओवादी पाखें प्रशासन ज्याकू घेराउ
इनरुवा व नुवाकोटय् ल्वापू
नागरिक सर्वोच्चताया माग यासें निक्वःगू आन्दोलन यानाच्वंपिं एनेकपा (माओवादीं) स्वनिगया नापं न्ह्यन्यागूलिं जिल्लाया प्रशासन ज्याकू घेराउ याःगु दु । बुधवाः ज्याकू ई जुइवं माओवादी कार्यकर्तातय्सं नाराबाजी यासें प्रशासन ज्याकूत घेराउ याःगु खः । अन प्रर्दशनकारीतय्सं नाराबाजी यायेगु नापं म्ये हाला प्याखँ नं ल्हूयाच्वंगु दु ।
येँया बबरमहलय् च्वंगु जिल्ला प्रशासन ज्याकूथी माओवादी कार्यकर्तातयसं ज्याकू ई स्वयां न्ह्य हे अन मुनाः घेराउ ज्याझ्वः शुरु याःगु खः । प्रर्दशनकारीतय्सं ज्याकू दुने सुं नं कर्मचारीतय्त दुहांवने ब्यूगु मदु । सतकय् च्वना नागारबाजी यानाः जिल्ला प्रशासन ज्याकू घेराउ याःगुलिं बुद्धनगर, अनामनगर, शंखमूल, घट्टेकुलो लगायत क्षेत्रया यातायात प्रभावित जूगु दु ।
थ्वहे दथुइ नुवाकोट प्रशासन ज्याकूथी माओवादी कार्यकर्ता व प्रहरी दथुइ ल्वापू जूगु दु । ज्याकू ई शुरु जुइवं मू लूखाय् दुहां वनाः नाराबाजी यायेवं प्रहरीं हस्तक्षेप याःगु खः । हस्तक्षेपय् छुं माओवादी कार्यकर्ता घाःपाः जूगु दु ।
अथेहे जिल्ला प्रशसान ज्याकू घेराउ यायेगु झ्वलय् सुनसरीया इनरुवाय् प्रहरी व माओवादी कार्यकर्ता दथुइ जूगु ल्वापूइ झिंम्ह स्वयां अप्वः माओवादी कार्यकर्तात घाःपाः जूगु दु ।
