विधान संशोधन प्रस्तावय् अझ सहमति जुइमफुत
स्वन्हु न्ह्यः निसें जुयाच्वंगु नेपाली कांग्रेस महासमितिया मंगलवाःया बैठकय् अझ नं सहमति जुइमफुत । विधान संशोधन प्रस्ताव बारे सहमति मजुया बैठकय् राष्ट्रिय राजनीति, संघीय संरचना, शान्ति प्रकृया, संविधान निर्माण आदि थंज्याःगु मुख्य मुद्दाय् दुहां वनेफुगु मदुनी ।
सभापतीय प्रणाली वा सामूहिक नेतृत्व प्रणालीलय् वनेगु बारे जुयाच्वंगु विवाद मंगलवाःया महासमितिया बैठकय् नं कायम जुल । मंगलवाःया बैठकय् न्ववापिं च्यय्गू प्रतिशत नेतातय्सं सामूहिक नेतृत्व प्रणालीलय् वनेमाःगु बिचाः प्वंकूगु खसां सभापतीय प्रणालीया पक्षय् खनेदुम्ह कार्यवहाक सभापति सुशील कोइरालाया दबाबया कारणं विधानयात अन्तिम निष्कर्षय् थ्यंकेमफुगु खः ।
मंगलवाःया बैठकय् पीच्याम्ह महासमिति दुजःतय्सं थःथःगु बिचाः प्वंकूगु खः । उकी मध्ये स्वीच्याम्हेसिनं सामूहिक नेतृत्व प्रणालीया पक्षय् न्ववाःगु खःसा झिम्ह दुजःतय्सं जक वर्तमान सभापतीय प्रणालीया वकालत याःगु खः ।
सामूहिक नेतृत्वया पक्षय् न्ववापिं नेतातय्सं सभापतीय प्रणलीं कांग्रेसयात न्हूगु जीवन बीमफइगु धासें आः नं थ्वहे व्यवस्था जुसाः थकीं छगू हे छेँया दुजःयात जक स्थापित याकीगु खँ प्वंकूगु खः । अथेहे सभापतीय प्रणलीया पक्षय् दुपिं नेतातय्सं सभापति कमजोर जुसाः पार्टीइ विभाजन वयेफइगु धासें पदाधिकारी सहित न्यय्गू प्रतिशत दुजःत मनोनयन याये दइगु व्यवस्था जुइमाःगु तर्क पेश याःगु खः ।
बहुमत दुजःत सामूहिक नेतृत्व प्रणालीया पक्षय् दुसां निष्कर्षय् थ्यनेमफुगु धासें महासमितिया दुजःतय्सं सहमतिया छगू हे प्रस्ताव ह्येत नेतृत्वयात दबाब ब्यूगु दु ।
मंगलवा प्रदीप गिरी, मधु आचार्य, नवीन्द्रराज जोशी, अम्बिका पन्त, रामनाथ अधिकारी, यज्ञराज जोशी, तुलसी श्रेष्ठ, ओमकार श्रेष्ठ, भुटनदेवी खवास, मोहन बस्नेत लगायतया दुज:तय्सं सामूहिक नेतृत्वया पक्षय् न्ववा:गु खसा: सभापतीय प्रणालीया पक्षय् यज्ञबहादुर थापा, खगेन्द्र रेग्मी, सुधीर शिवाकोटी, मैयादेवी श्रेष्ठ लगायत नेतातय्सं न्ववा:गु ख: ।
