'गम्भीर वार्ता प्रारम्भ'
स्यनावनाच्वंगु राजनीतिक अवस्थाया दथुइ नेकपा (एमाले)या प्रभावशाली नेता केपी शर्मा ओलीया छेँय् मंगलवाः प्रमुख स्वंगू दलया शीर्ष नेतात दथुइ जूगु खँल्हाबंला पाखें गम्भीर वार्ताया प्रारम्भ जूगु खँ नेतातय्सं धाःगु दु ।
राजनीतिक अवस्था अतिकं जटिल अवस्थाय् थ्वनेवं बजेट नं पारित जुइमफुगु ई वयेवं नेता ओलीं राजनीतिक सहलह यायेगु ताः तयाः मंगलवाः बहनी ख्वपय् च्वंगु थःगु हे छेँय् बेली भोय् सतादीगु खः । उगु ईलय् सत्तारुढ नेपाली कांग्रेस व एमाले नापं प्रमुख प्रतिपक्षी एनेकपा (माओवादी)या शीर्ष नेतातय् ब्वति दुगु खः ।
बेली भोय् नापं निघौ तक जूगु राजनीतिक सहलहलय् छुं सहमति जुइ मफुसां नेतातय्सं थ्व गम्भीर वार्ताया प्रारम्भ जूगु खँ धाःगु दु । सहलह लिपा संचारकर्मीत नाप खँल्हाबंला यानादिसें माओवादी अध्यक्ष पुष्पकमल दाहाल 'प्रचण्डं' राजनीतिक समस्या समाधानया निंतिं गम्भीरतापूर्वक सहलह जूगु धयादिसें आः थुकीं निरन्तरता काइगु धयादिल ।
अथेहे कांग्रेस संसदीय दलया नेता रामचन्द्र पौडेलं स्वंगूलिं दलं थःथः दुने दुगु शंका व अविश्वासया वातावरणया बारे खुलस्त रुपं सहलहया झ्वलय् तःगु धयादिल । वयेकलं सहलह यानाः तुं वनेगु व सहमतिया निंतिं न्ह्याः वनेगु धयादिल ।
सहलहलय् माओवादी अध्यक्ष प्रचण्ड, उपाध्यक्षत मोहन वैद्य 'किरण', डा. बाबुराम भट्टराई व प्रकाश, कांग्रेस पाखें वरिष्ठ नेता शेरबहादुर देउवा, संसदीय दलया नेता पौडेल व महामन्त्री डा. रामशरण महत व एमालेया पाखें प्रधानमन्त्री माधवकुमार नेपाल, नेता ओली व महासचिव ईश्वर पोखरेलया ब्वति दुगु खः ।
