'माओवादीं शान्ति सम्झौता उल्लंघन यात'
सेना सहित दक्वं सुरक्षा अंग यात उच्च सतर्कताय् च्वनेत निर्देशन
सरकारं एनेकपा (माओवादीं) बृहत शान्ति सम्झोता उल्लंघन याःगु निष्कर्ष पिकासें सेना सहित दक्वं सुरक्षा अगंयात उच्च सतर्कताय् च्वनेत निर्देशन ब्यूगु दु ।
मंगलवाः च्वंगु मन्त्रिपरिषदया बैठकय् माओवादीं आन्दोलनया घोषणा याःगु, स्थानीय निकाय कब्जा यानाः पादधिकारीत तकं घोषणा याःगु नापं गणराज्य घोषणा यायेगु लगायत ज्या शान्ति सम्झौता विपरित जूगु निष्कर्ष पिकाःगु खः । नापं मन्त्रिपरिषदया बैठकं माओवादीं याःगु शान्ति सम्झौता विपरित ज्याया बारे राष्ट्रसंघीय मिसन (अनमिन)यात नं सचेत याकेगु निर्णय याःगु दु ।
सरकारया प्रवक्ता नापं सुचना व संचार मन्त्री शंकर पोखरेलं माओवादीं बृहत शान्ति सम्झौता विपरित ज्या याना वयाच्वंगुलिं दक्वं सुरक्षा अंगयात उच्च सतर्कताय् च्वनेत निर्देशन बियाःगु खँ कनादिल ।
मन्त्रिपरिषदया बैठकय् मन्त्री, राज्यमन्त्री, सहायकमन्त्रीत नापं नेपाली सेनाया प्रधानसेनापति, सशस्त्र प्रहरीया महानिरीक्षक, नेपाल प्रहरीया महानिरीक्षक, राष्ट्रिय अनुसन्धान विभागया प्रमुख, गृहसचिव, शान्ति सुरक्षा महाशाखाया प्रमुख सचिव व उपसचिवया नं उपस्थिति दुगु खः ।
प्रधानमन्त्री माधव नेपालया नेतृत्वय् सरकार गठन लिपाः दक्वं सुरक्षा निकायया प्रमुखतय् नं मन्त्रिपरिषदया बैठकय् सःता निर्देशन ब्यूगु थ्व न्हापांगु घटना खः ।
