माओवादी पाखें झिंनिगू देय्या कुटनीतिक अधिकारीत नाप सहलह
आन्दोलनरत एनेकपा (माओवादीं) थीथी झिंनिगू देय्या राजदूत व उच्च कुटनीतिक अधिकारीत नाप सहलह याःगु दु ।
मंगलवाः न्हिनय् होटल अन्नपूर्णय् जूगु सहलह ज्याझ्वलय् माओवादी पाखें अध्यक्ष पुष्पकमल दाहाल 'प्रचण्ड' व विदेश विभाग प्रमुख कृष्णबहादुर महराया ब्वति दुगु खः । उगु ईलय् वर्तमान राजनीतिक परिस्थितिया बारे सहलह यायेगु नापं माओवदीं शान्ति प्रकृया प्रति थःपिं प्रतिबद्ध जूगु खँ तःगु खः ।
माओवादी विदेश विभाग प्रमुख महरां नागरिक सर्वोच्चताया निंतिं निगू चरणया आन्दोलनय् माओवादी दुसां थःपिं शान्ति प्रकृया व संविधान निर्माण प्रति प्रतिबद्ध जूगु खँ विदेशी कुटनीतिक अधिकारीतय् दथुइ तयाःगु कनादिल ।
बैठकय् बेलायत, फ्रान्स, डेनमार्क, फिनल्याण्ड लगायत देय्या राजदूततय्सं ब्वति काःगु खसाः अमेरिका, भारत लगायत देय्या कुटनीतिक अधिकारीतय्सं जक ब्वति काःगु खः ।
