कारवाहीया जिम्मा महरायात
हिमाल मिडियाय् आक्रमण याःपिंत कारवाही यायेगु जिम्मा सूचना तथा संचारमन्त्री कृष्णबहादुर महरायात बिउगु दु । थौं सुथय् च्वंगु मन्त्रिपरिषद्या बैठकं मन्त्री महरायात उगु जिम्मा बिउगु खः । मन्त्री महरां थौं न्हिछि उकिया प्रारम्भिक छानवीन यानाः सरकारयात विवरण बीगु जूगु दु ।
हिमाल मिडियाय् आक्रमण याःपिंत कानुनी कारवाही जक मखु पार्टीपाखें आन्तरिक कारवाही समेत यायेगु खँ नं प्रम प्रचण्डं कनादीगु दु ।
उखे उप-प्रम व गृहमन्त्री वामदेव गौतमं हिमालय् जूगु आक्रमणय् संलग्निपंत कारवाही यायेगु प्रतिवद्धता प्वंकादीगु दु । मन्त्रिपरिषद् बैठक लिपा पत्रकारतलिसे खँ ल्हासें वय्कलं उगु प्रतिवद्धता प्वंकादीगु खः ।
पत्रकारतय्सं थःपिनि प्रदर्शनया झ्वलय् निषेधित क्षेत्र उल्लंघन याःगुलिं प्रहरी हस्तक्षेप यायेमाःगु खः धासें निषेधित क्षेत्रय् आन्दोलन मयायेत इनाप यानादिल ।
बैठकय् उद्योग मन्त्री अष्टलक्ष्मी शाक्यं औद्योगिक क्षेत्रय् जुयाच्वंगु अराजकता बारे नं प्रधानमन्त्रीया ध्यानाकर्षण यानादीगु खःसा लिसलय् प्रमं औद्योगिक सुरक्षाया न्हूगु नीति हयेगु बिचाः प्वंकादीगु खः ।
