प्रचण्ड थम्हं हे नेवाः गणराज्य घोषणा याइगु
येँ (सन्ध्या टाइम्स)/माओवादीं न्ह्याकाच्वंगु निगूगु चरणया आन्दोलनया झ्वलय् थ्वहे वइगु कार्तिक २३ गते येँया बसन्तपुली छगू ज्याझ्वः यासें नेवाः स्वायत्त गणराज्य घोषणा याइगु जूगु दु। माओवादीं थीथी जातीय गणराज्य घोषणा यायेगु झ्वलय् दकलय् न्हापांगु घोषणा नेवाः राज्यपाखें यायेत्यंगु खः ।
उगु घोषणा सभाय् स्वयम् माओवादी अध्यक्ष प्रचण्ड हे उपस्थित जुयादीगु खँ धाःगु दु। नेवाः गणराज्य घोषणा लिपा थन माओवादीया गतिविधि उकथं हे सञ्चालन जुया वनी।
नेवाः स्वायत्त राज्यया घोषणा लिपा कार्तिक २४ गते माओवादीं राजधानी नाकाबन्दीया ज्याझ्वः यायेत्यंगु दु। वकुन्हु राजधानी वयेगु फुक्क स्थल, हवाई यातायात समेत ठप्प यायेगु ग्वसाः दु। वकुन्हु येँया त्रिभुवन अन्तर्राष्ट्रिय विमानस्थल समेत बन्द यायेगु जूगुलिं थःपिनि विमान ब्वयेके मते धकाः माओवादीं थनया फुक्क हे एअरलायन्सतय्त पौ नं बीधुंकूगु दु। वकुन्हुया नाकाबन्दीं राजधानी छगू कथं बन्द जुइगु खँ सूत्रं धाःगु दु।
थ्व धुंकाः माओवादीं सिंहदरवारय् प्रधानमन्त्री, मन्त्री व कर्मचारी दुहां वने मफयेक घेरे यायेगु ज्याझ्वः दयेकूगु दु ।
विशेष सुरक्षा बैठक
माओवादीं न्ह्याकाच्वंगु आन्दोलन बारे विशेष रुपं बिचाः यायेत थौं मन्त्रिपरिषद्या आकस्मिक बैठक च्वंगु दु। गृह मन्त्रालयया आयोजन धाःसां प्रमपाखें हे सःतूगु उगु बैठकं माओवादी आन्दोलनया सन्दर्भय् विशेष सुरक्षा रणनीति दयेकी धाःगु दु। बैठकय् फुक्क हे मन्त्रीतय्त अनिवार्य उपस्थिति जुइत निर्देशन बियातःगु खः। बैठकय् प्यंगुलिं सुरक्षा निकायया प्रमुखत नं उपस्थित जुयाच्वंगु दु ।
