धनकुटाय् माओवादी ज्याकुथी मि तल
येँ (सन्ध्या टाइम्स)/एमाले समर्थित युथ फोर्सया कार्यकर्तातय्सं धनकुटाय् माओवादीया जिल्ला ज्याकू तोडफोड याना बिउगु दु। युथ फोर्स कार्यकर्तातय्सं अनया हुलाक टोलय् च्वंगु माओवादी जिल्ला ज्याकू लगायत थीथी जनवर्गीय संगठनया ज्याकू तोडफोड यायेगु लिसें अन दुगु भ्वं, ध्वाँय् आदि नं पिने हयाः च्याका बिउगु खः।
अथे हे युथ फोर्सया कार्यकर्तां सिंढुवाया १२ खा माओवादीया छेँय् नं तालं ग्वया बिउगु दु ।
म्हिगः बहनी सिंढुवाय् माओवादीया कार्यकर्तातय्सं युथ फोर्सया कार्यकर्तां गया वःगु गुंगः मोटरसाइकल व छगः भ्यानय् मिं तया बीवं थौं सुथंनिसें युथ फोर्सया कार्यकर्तातय्सं धनकुटाय् तोडफोड यायेगु लिसें जिल्ला बन्द याना बिउगु खः ।
युथ फोर्सं थःपिनि सवारी साधनय् मि तया बिउगु विरोधय् अनिश्चितकालीन धनकुटा जिल्ला बन्दया घोषणा यासें घटनाय् ल्हाः दुपिंत कारवाही यायेमाःगु व क्षतिपूर्ति बीमाःगु माग याःगु दु ।
