आन्दोलनयात कयाः माओवादी प्रशिक्षण
येँ (सन्ध्या टाइम्स)/नागरिक सर्वोच्चता स्थापना यायेगु माग यानाः आन्दोलनय् कुहां वःगु एनेकपा माओवादीं थौं थःपिनि कार्यकर्तायात प्रशिक्षण व थीथी थासय् प्रचार व सभा यायेगु खँ प्रवक्ता दिनानाथ शर्मां पत्रकारतय्त कनादीगु दु ।
अथे हे माओवादीं आन्दोलनया निंतिं थौं पार्टी दुने गृहकार्य नं यानाच्वंगु खँ सीदुगु दु। थ्वहे झ्वलय् वाईसीएलयात नं आन्दोलन बारे प्रशिक्षण बिउगु दु। माओवादी उपाध्यक्ष नारायणकाजी श्रेष्ठं प्रशिक्षण बीगु उगु ज्याझ्वः यलया ग्वार्कोय् च्वंगु खन्ना गार्मेन्टय् जुयाच्वंगु दु ।
उगु प्रशिक्षणया झवलय् आन्दोलनया स्वरुपयात कयाः सहलह जुइगु खँ धाःगु दु। म्हिगः माओवादीं देय्न्यंकंया स्थानीय निकाय ठप्प याःगु खःसा कन्हय् देय्न्यंकंया जिल्ला प्रशासन ज्याकू ठप्प यायेगु कथं आन्दोलनया ज्याझ्वः क्वःछिनातःगु दु ।
अथे हे न्ह्यानाच्वंगु आन्दोलन व उकियात कयाः समिक्षा यायेगु निंतिं थौं संयुक्त राष्ट्रिय जनआन्दोलन समितिया बैठक नं च्वनेत्यंगु दु ।
सेनापति प्रकरणय् राष्ट्रपतिं ल्ह्वंगु पलाः भिंकेमाःगु माग यासें आन्दोलन याना वयाच्वंगु माओवादीं सरकारयात मछिनीगु कथं स्वनिगः नाकाबन्दी यायेगु तकंया आन्दोलन घोषणा यानातःगु दु ।
