वंगु वालय् जक झिम्हेसिया हत्या
सरकारं तराईया सशस्त्र पुचःतलिसे वार्ता न्ह्याकाच्वंसां अन हत्या हिंसाया क्रम धाःसा दिउगु मदुनि । पूर्वी तराईलय् जक वंगु छवाःया दुने झिम्हेसिया हत्या जुइधुंकूगु दु ।
सरकारं छुं सशस्त्र पुचःलिसे वार्ता याःसां मेगु दर्जनौं पुचःतलिसे वार्ता याइगु संकेत धाःसा आः तक मवःनि । वार्ताया थ्वहे अन्यौलं यानाः थज्याःगु स्थिति पिहां वःगु खँ मानव अधिकारवादीकर्मीतय्सं धायेगु यानाच्वंगु दु । मध्य पूर्वी तराईया सप्तरीं निसें पर्सा तकया च्यागू जिल्लाय् वंगु वालय् हत्या जूपिं झिम्ह मध्यय् राज्य पक्षं स्वम्ह व मेमेगु पक्षं न्हय्म्हेसित स्याःगु खः । धनुषाय् छम्ह कर्मचारी व छम्ह सशस्त्र प्रहरी नापं यानाः न्याम्हेसित स्याःगु खः । अथे हे पर्साय् निम्ह व सप्तरी，सर्लाही व सिराहा जिल्लाय् छम्ह छम्हेसिया हत्या जूगु दु । थ्व क्षेत्रय् वंगु खुलाया दुने सछिम्ह मनू स्यायेधुंकूगु खँ मानव अधिकारवादीतय्सं धाःगु दु ।
सरकारी वार्ता पुचलं वंगु महिनाय् मधेशी भाइरस किलस्रलिसे औपचारिक वार्ता याःसां मेगु संगठनतलिसे वार्ता याःगु मदुनि ।
थ्वहे झ्वलय् थौं सरकारं संयुक्त तराई मुक्ति मोर्चालिसे जनकपुरय् वार्ता यायेत्यंगु दु । वार्ताया निंतिं सरकारी पुचः उखे वनेधुंकूगु दु । थौं बहनी स्थानीय रामा होटलय् थ्व वाता जुइगु खँ दु ।
