नेप्से सामान्य थहां वन
येँ (सन्ध्या टाइम्स)/नेप्से परिसुचक बाःछि लिपा तसकं सामान्य अंकं थहां वंगु दु। नेपाल स्टक एक्सचेन्जय् जूगु शेयर कारोबारं नेप्से परिसुचक स्वन्ति नखः धुंकाःया म्हिगः सामान्य थहां वंगु खः। मोहनि नखः धुनेवं शुरु जूगु शेयर कारोबारं निन्हु व स्वन्ति नखः न्ह्यः निन्हु थहां वंगु नेप्से वयां लिपा मदिक कुहां वयाः ६ सय अंकं क्वय् थ्यंगु खः। म्हिगः नं कारोबार शुरु जूगु छुं ई तक स्थिर जूगु नेप्से झण्डै बाघौ लिपा कुहां वयाः ५६० अंकं नं क्वय् कुहां वयेधुंकूगु खः। लिपा बजाः बन्द जुइ स्वयां घौछि न्ह्यः बुलुहुँ नेप्से थहां वनेवं ताः लिपाः म्हिगः नेप्से सामान्य थहां वंगु खः ।
वंगु आइतवाःया शेयर बजारय् वाणिज्य समुहया दक्वं धइथें बैंकया शेयर भाः कुहां वनेवं नेप्से नं १० अंकं कुहां वंगु खः। म्हिगः नं वाणिज्य समुह मू मू बैंकत नविलया ९६/-, स्टायण्डर्डया ४० लिसें मेमेगु नं बैंकया शेयर भाः कुहां वंसा बीओके, एभरेष्ट, इन्भेष्टमेण्ट, सिदार्थ लगायतया मेमेगु बैंकया शेयरय् छन्हु न्ह्यःया ल्याखय् थहां वंगुलिं नेप्से शुन्य दशमलव २१ अंकं थहां वनाः ५६७ दशमलव २७ अंकय् थ्यंगु दु। मेखे सेन्सेटिभ धाःसा म्हिगः नं शुन्य दशमलव १६ अंकं कुहां वनेवं १४० दशमलव ८८ अंकय् थ्यंगु दु। उखे फ्लोट नं ताः ई लिपा शुन्य दशमलव शुन्य ६ अंकं थहां वन ।
नेप्सेय् म्हिगःया शेयर कारोबारं वाणिज्य समुहया उपसुचक छगू बाहेकं मेमेगु समुहया उपसुचक कुहां वंगु दु। वाणिज्य समुह ३ दशमलव शुन्य ४ अंकं थहां वनाः ५३८ दशमलव ५६ अंकय् थ्यंगु दु। विकास बैंक समुह ६ दशमलव ५ अंकं कुहां वयाः ६३२ दशमलव ८ अंकय् थ्यंगु दुसा दबलय् अप्वः जलविद्युत समुह २२ दशमलव ७९ अंकं कुहां वयेवं ८०६ दशमलव ३ अंकय् थ्यंगु दु। अथेहे फाइनान्स समुह २ दशमलव ५५ अंकं कुहां वयाः ६०४ दशमलव ३३ अंकय् व थ्यंगु दुसा छन्हु न्ह्यः थहां वंगु वीमा समुह म्हिगः धाःसा यथावत हे कायम जुल ।
मेखे छन्हु न्ह्यःया तुलनाय् शेयर व दांया कारोबार नं गाक्कं कुहां वःगु दु। आइतवाः निगू लाख झिंगुद्वः निसः व नीन्यागू कित्ता शेयर न्याये-मी जुयाः च्यागू करोड पीनिगू लाख प्यद्वः तका दांया कारोबार जूगु खः। म्हिगः धाःसा न्हय्न्हय्द्वः च्यासः व पीस्वंगू कित्ता शेयर न्याये-मी जुयाः न्यागू करोड नीच्यागू लाख न्हय्प्यद्व्क तका दांया कारोबार जुल ।
कारोबार कम्पनी मध्ये दांया ल्याखं दकलय् अप्वः नेपाल एसबीआई बैंक ग्वीगुंगू लाख गुद्वः तका दांया कारोबार याःगु दु। लुम्बिनी बैंकं दकलय् अप्वः कमे याःगु दुसा एस डेभलपमेण्ट बैंक दकलय् अप्वः गुमे याःगु दु ।
