एमाले व माओवादी कार्यकर्तात दथुइ ल्वापू लिपा घनकुटा बन्द
सत्ता नेतृत्व यानाच्वंगु नेकपा (एमाले)या युथ फोर्सया कार्यकर्ता व प्रमुख प्रतिपक्षी दल एनेकपा (माओवादी)या कार्यकता दथुइ सोमवाः जूगु ल्वापूं तच्वःगु रुप कायेवं युथ फोर्सया कार्यकर्तातय्सं मंगलवाः निसें अनिश्चितकालीन धनकुटा बन्दया घोषणा याःगु दु ।
धनकुटाया अर्खौले जितपुर बजारय् माओवादी व एमाले कार्यकर्तात दथुइ ल्वापू जुइवं उखे पाखे वनाच्वंगु युथफोर्सया कार्यकर्तातय् मोटरसाइकल व भ्यानयात माओवादी कार्यकर्तातय्सं सोमवा: बहनी च्याकाब्यूगु धासें युथफोर्सया कार्यकर्तातय्सं मंगलवाः माओवादी जिल्ला कमिटी व जनवर्गीय संगठनया ज्याकूथी तोडफोड याःगु दुसाः अन दुने च्वंगु भ्वँत पिने हयाः च्याकाः ब्यूगु दु ।
युथफोर्सया धनकुटा शाखां मोटरसाईकलय् मी च्याकूगु घटनाय् संलग्न मनूतय्त कारवाही जुइमाःगु व क्षतिपूर्ति दयेमाःगु माग यासें अनिश्चितकालीन बन्द याःगु खः । बन्दया कारणं मंगलवाः सुथंनिसें अन सवारीसाधन चलेजुइफुगु मदुसाः बजाः दक्वं बन्द जुयाच्वंगु दु ।
