विधान संशोधन प्रस्ताव बारे सहलह जारी
नेपाली कांग्रेसया महासमितिया बैठकय् बुधवाः नं विधान संशोधन प्रस्ताव बारे पदाधिकारी व केन्द्रीय नेतातय्सं थःथःगु बिचाः प्वंकीगु जूगु दु । सोमवाःया बैठकय् दक्वं नेतातय्सं थःगु बिचाः प्वंकेगु ज्या क्वमचाःगुलिं मंगलवाः नं थुकीयात हे निरन्तरता बीगु जूगु दु ।
थ्वस्वयां न्ह्यः सोमवाः न्ववापिं अधिकाशं नेतातय्सं पदाधिकारीत मनोनित यायेगु परम्परा हिलाः सामूहिक नेतृत्वय् यंकेमाःगु पक्ष न्ववाःगु खः । कांग्रेस केन्द्रीय दुजः कृष्णप्रसाद सिटौला संयोजक कथं च्वनादीगु समितिं पेश याःगु विधान मस्यौदाय् सोमवाः स्वीप्यम्ह नेतातय्सं न्ववानादीगु खः ।
बैठकय् केन्द्रीय नेता नरहरि आचार्य लगायत नीछम्ह नेतातय्सं पार्टीयात सामूहिक नेतृत्व प्रणलीलय् यंकेमाःगु पक्ष न्ववाःगु खसाः न्ह्यम्ह नेतातय्सं पदाधिकारी व न्यय्गू प्रतिशत केन्द्रीय दुजःत मनोनित यायेगु अधिकार बियाः सभापतीय प्रणालीयात हे निरणतरता बीमाःगु पक्षय् न्ववा:गु खः । अथेहे देउवा निकट खुम्ह नेतातय्सं धाःसा मध्यमार्गी लँपूइ वनेमाःगु बिचाः प्वंकूगु खः ।
आइतवाः महासमितिया बैठक उल्लेज्या यानादिसें कांग्रेस सभापति गिरिजाप्रसाद कोइरालां सभापतीय प्रणालीयात हे निरन्तरता बित महासमितिया पदाधिकारीतय्त इनाप यानादीगु खः ।
