'माओवादीयात लडाकू व ल्वाभः मुक्त याये धुंका जक संविधान च्वयेगु ज्या क्वचाइ'
प्रधानमन्त्री माधवकुमार नेपालं माओवादीयात लडाकू व ल्वाभः मुक्त याये धुंका जक संविधान च्वयेगु ज्या क्वचाइगु खँ धयादीगु दु ।
मोरङया हात्तिमुढाय् निर्माण याःगु मनमोहन स्मृति पोलिटेक्नीकया उल्लेज्या यानादिसें प्रधानमन्त्री नेपालं छुं नं पार्टीया ल्हातय् ल्वाभः दुसाः उकीं आः वइगु निर्वाचनय् असर लाकीगु धयादिल । मनूया ल्हातय् ल्वाभः व पार्टीया ल्हातय् सेना दुगु ई तक नागरिकतय्सं स्वतन्त्राया अनुभुती यायेमफइगु धयादिसें वयेकलं ल्वाभः व्यवस्थापन मजूतल्ले संविधान निर्माणं गति कायेमफइगु दाबी यानादिल ।
प्रधानमन्त्री नेपालं माओवादीयात बहुमत खाकाः सरकारया नेतृत्व यायेत हाथ्या नं बियादिल । वयेकलं आः द्वन्द्व अप्वयेकेत आन्दोलन यायेगु ई मजूगु धयादिसें सतकय् टायर च्याकाः समस्या समाधान जुइगु बिचाः माओवादीं यानाच्वंगु खसाः व माओवादीया भ्रम जक जूगु टिप्पणी यानादिल ।
उगु हे ज्याझ्वलय् उपप्रधानमन्त्री विजयकुमार गच्छदारं माओवादीया कारणं संविधान निर्माण यायेगु ज्या लिबानाच्वंगु द्वपं बियादिल । नेपाली जनतां विकास मालाच्वंगु धयादिसें उपप्रधानमन्त्री गच्छदारं राजनीतिं भविष्यया कर्णधारया भविष्यय् खेलबाद यायेमज्यूगु बिचाः प्वंकादिल ।
अथेहे एमाले अध्यक्ष झलनाथ खनालं देशय् आर्थिक क्रान्ति यायेमाःगु ई वःगु खँ धयादिल । वयेकलं शान्ति स्थापना मजुइकं आर्थिक क्रान्ति यायेमफइगु धयादिसें माओवादीयात शान्ति प्रकृया क्वचायेकाः समृद्ध नेपाः निर्माण यायेत इनाप यानादिल ।
उगु ज्याझ्वलय् प्रधामन्त्री नेपाल, उपप्रधानमन्त्री गच्छदार नापं उद्योगमन्त्री महेन्द्र राय यादव, शिक्षामन्त्री रामचन्द्र कुशवाहा, एमाले अध्यक्ष खनाल, महासचिव ईश्वर पोखरेल व भारतीय राजदूत राकेश सुदं नं ब्वति दुगु खः ।
