देय्न्यंकं स्थानीय निकाय ठप्प
येँ (सन्ध्या टाइम्स)/ नागरिक सर्वोच्चताया माग यासें म्हिगःनिसें निक्वःगु आन्दोलन न्ह्याकूगु माओवादीं थौं देय्न्यंकंया स्थानीय निकाय ठप्प याना बिल ।
येँ मनपाय् माओवादी केन्द्रीय नेता सहितया पुचलं धर्ना बियाच्वंगु दु। माओवादी धर्नाया कारणं उगु लँपु जुयाः चले जुइगु सवारी साधन ठप्प जुयाच्वंगु दुसा नगरपालिकाय् ज्या ज्वनाः वःपिं सर्वसाधारण जनताया ज्या नं बन्द जुयाच्वंगु दु
।
अथे हे यल उपमनपा व ख्वप नपाय् नं माओवादी कार्यकर्तातय्सं धर्ना बियाच्वंगु दु। उखे नुवाकोटया विदुर नगरपालिका व अनया ६१ गू गाविसय् नं ज्या ठप्प जुयाच्वंगु खँ धाःगु दु। अथे हे हिमाली लागाय् लाःगु रसुवा जिल्लाया झिंखुगू गाविसय् नं ज्या ठप्प जुयाच्वंगु दु ।
देय्न्यंकंया स्थानीय निकाय ठप्प जुयाः नाता प्रमाणित यायेगु, विवाह दर्ता यायेगु, मृत्यु दर्ता यायेगु, छेँ दनेत नक्सा पास याये माःगु लिसें जनतालिसे प्रत्यक्ष संलग्न दुगु ज्या प्रभावित जुयाच्वंगु दु ।
माओवादीया थ्व घेराउ ज्याझ्वः बहनी ५ बजे तक न्ह्याइगु खँ धाःगु दु। थ्व ज्याझ्वलं यानाः गुलिखे थासय् थौं भिटामिन ए नकेगु ज्याझ्वः नं प्रभावित जूगु दु ।
