वीरगञ्जय् अप्वल अपहरण
येँ (सन्ध्या टाइम्स)/वीरगञ्जय् वंगु छुं न्हि न्ह्यवंनिसें अपहरणया घटना अप्वया वंगु दु। अनया रानीघाट व श्रीपुरय् डेरा कयाः च्वनाच्वंपिं संगठित व्यक्तित थज्याःगु अपहरणय् संलग्न दुगु खँ धाःगु दु ।
थ्व संगठित अपहरणकारीतय्सं नेपालं अपहरण यानाः भारतपाखे यंकेगु व भारतं अपहरण यानाः नेपालय् हयेगु ज्या यानाच्वंगु खँ धाःगु दु ।
विशेष यानाः बोर्डिङ्ग स्कूलय् आखः ब्वनाच्वंपिं मस्तय्त थुमिसं थःपिनि निशाना दयेकाच्वंगु दु। बोर्डिङ्गय् ब्वनीपिं मस्त मध्ये नं गाक्क फिरौटी पुलेगु हैसियत दुपिं मस्तय्त अप्वः ताके याइगु खँ नं धाःगु दु ।
उमिसं मस्तय्त बेहोस जुइगु वासः नतुंकाः मोटरसाइकलय् तया यंकीगु व लिपा मचाया मां अबुपिंत फोन यानाः फिरौटी कायेगु ज्या यानाच्वंगु दु। तर प्रहरीं धाःसां उमिगु बारे अझ नं बांलाक सीके मफुनिगु खँ नं विज्ञ सूत्रं धाःगु दु। वीरगञ्जय् थुकथं अपहरणया घटना अप्वया वनेवं स्थानीय व्यापारीत त्रसित जुयाच्वंगु दु ।
