प्रधानमन्त्री विराटनगरपाखे
येँ (सन्ध्या टाइम्स)/माओवादी आन्दोलनया झ्वलय् देय्या स्थानीय निकाय ठप्प जुयाच्वंगु इलय् प्रधानमन्त्री माधव नेपाल धाःसा विराटनगरय् जुइगु छगू ज्याझ्वलय् ब्वति कायेत उखे झाःगु दु ।
मोरङय् मनमोहन स्मृति प्रतिष्ठानं दयेकेत्यंगु पोलिक्लिक भवनया उलेज्या यायेत वय्कः उखे झाःगु खः।
वय्कलं अन मोरङ व्यापार संघं ग्वसाः ग्वःगु छगू ज्याझ्वलय् नं ब्वति कयादी ।
प्रधानमन्त्री नेपालया लिसें भारतीय राजदूत राकेश सुद नं उखे झाइगु ज्याझ्वः दुगु खँ सीदुगु दु ।
उखे प्रधानमन्त्रीया विराटनगर भ्रमणया विरोध यायेगु तयारी स्थानीय माओवादी कार्यकर्तातय्सं यानाच्वंगु खँ सीदुगु दु।
पूर्वाञ्चल विश्वविद्यायया दीक्षान्त समारोहय् ब्वति कायेत वंगु इलय् माओवादी कार्यकर्तातय्सं प्रमयात हाकुगु ध्वाँय् क्यंगु खःसा अबलय् प्रहरी व माओवादी कार्यकर्ता दथुइ ल्वापु जुयाः आपालं क्षति जूगु खः। माओवादीं थःपिनि आन्दोलनया झ्वलय् मन्त्री प्रधानमन्त्रीतय् सवारी प्रभावित यायेगु खँ धाःगु दु ।
