एस्पेरान्तो क्लबया मिखा शिविर
येँ (सन्ध्या टाइम्स)/स्वनिगलय् एस्पेरान्तो भाय् प्रचार प्रसार यायेत स्वंगु काठमाडौं एस्पेरान्तो क्लबया ग्वसालय् वंगु शनिवाः कुन्हु येँया प्रणिधिपूर्ण महाविहार बलम्बुइ निःशुल्क मिखा शिविर जुल ।
उगु शिविरय् नैकाप, बलम्बु, सतुगंल, मातातीर्थ, थक्वाः लिकसं लाःगु गांयालिसें येँ, यलया न्यासः व न्यय्म्ह मिखाया बिरामीतय्त निःशुल्क मिखा जाँचे यायेगु ज्या जूगु खः ।
वी.पी. कोइराला लायन्स नेत्र अध्ययन केन्द्र, शिक्षण अस्पतालपाखें प्रा.डा. जीवन कुमार श्रेष्ठया नेतृत्वय् झिम्ह दुजः दुगु पुचलं सुथसिया १० ताःई निसें सनिलया ४:३० ताः ई तक जाँच याःगु खःसा बिरामीतय्त निःशुल्क वासः इउँगु खः ।
जाँचे याकःवःपिं ज्याथजिथिपिंत निःशुल्क चस्मा बीगु व मोतीबिन्दु जूपिंत निःशुल्क अपरेशनया व्यवस्था नं याना बीगु जूगु दु ।
उगु ज्याझ्वःया निंतिं प्रणिधिपूर्ण महाविहारया भिक्षु सुख, अनागारिकापिंसं व परियत्ति शिक्षाया विद्यार्थीपिंसं ग्वहालि यानादीगु खः। ज्याझ्वः बुद्धपुजा व शीलप्रार्थना यानाः न्ह्याःगु खः ।
ज्याझ्वलय् वरिष्ठ नेत्र विशेषज्ञ डा. जीवनकुमार श्रेष्ठं शिविरं स्वनिगलय् च्वनाः नं मिखा थेंज्याःगु संवेदनशील व महत्वपूर्ण स्वास्थ्य सेवापाखें वन्चित जुयाच्वंपिं लाभान्वित जुइगुलिं क्लबं थज्याःगु ज्या न्ह्याका च्वनेमाःगु सुझाव बियादिल ।
विहारया सुख भन्तेनं बुद्धधर्मय् स्वास्थ्य सेवाया महत्व दुगुलिं फुफुगु ग्वहालि यायेमाःगु खँ धयाबिज्यात।
एस्पेरान्तो प्रशिक्षक राजेन मानन्धरं लोकतन्त्र, भाषिक अधिकार व बहुलसंस्कृतिवादया समर्थक थ्व एस्पेरान्तो भाय् आः समाजसेवा मार्फत समाजय् स्थापित जुइत स्वयाच्वंगु बांलाःगु खँ खः धयादिल ।
क्लबया अध्यक्ष अनिलरत्न तुलाधरं दक्वसिया ग्वहालि दत धाःसा क्लबं थीथी गामय् ज्याझ्वः न्ह्याकेगु बचं बियादिल। उगु ज्याझ्वलय् सुख भन्तें डाक्टरपिंत लुमन्तिचिं व स्वयम् सेवकपिंत हनापौ लःल्हाना बिज्याःगु खः ।
