नेप्से छन्हुं हे १० अंकं क्वय्
येँ (सन्ध्या टाइम्स)/नेपाल स्टक एक्सचेन्जया शेयर कारोबारं नेप्से परिसुचक कुहां वयेगु क्रमं म्हिगः आइतवाः नं निरन्तरता काःगु दु। शेयर बजाः थुकथं कुहां वयाच्वंगुयात स्वभाविक तायेके मफइगु खँ नेपाल स्टक एक्सचेन्जं धाःगु दु। शेयर बजाः कुहां वःगुया मुख्य कारण छखे बोनस व हकप्रद शेयर निष्काशन लिपाः वःगु हिउपाः खःसा मेखे नेप्सेय् सुचीकृत जूगु कम्पनीया साधारणत धमाधम जयाच्वंगुलिं नं लिच्वः लाःगु खँ स्टक एक्सचेन्जं न्ह्यथंगु दु। नेप्से निरन्तर कुहां वयाः झण्डै निदँ न्ह्यःया अवस्थाय् थ्यंगु दु ।
स्टक एक्सचेन्जय् जूगु शेयर कारोबारं म्हिगः नेप्से परिसुचक ११ दशमलव १३ अंकं कुहां वयाः ५६७ दशमलव शुन्य ६ अंकय् थ्यंगु दु। सेन्सेटिभ नं यक्व लिपा ३ दशमलव ५३ अंकं कुहां वःगु दुसा उखे फ्लोट १ दशमलव १४ अंकं कुहां वल ।
म्हिगःया शेयर कारोबारय् दक्व हे वाणिज्य समुहया शेयर भाः कुहां वःगु दु। वाणिज्य समुहया मेमेगु बैंकया शेयरय् सामान्य भाः कुहां वंसा मू मू बैंकत स्टायण्डर्ड चार्टर्ड बैंकया शेयरय् प्रति कित्ता ८३/-, इन्भेष्टमेण्ट बैंकया शेयरय् प्रति कित्ता ६२/-, नविल बैंकया शेयरय् प्रति कित्ता ५४/- तकाया लिसें सिदार्थ, ग्लोबल, बीओके, माछापुच्छ्रे बैंकया शेयरय् नं तच्वकं कुहां वःगु दु ।
दक्वं थें वाणिज्य समुहया शेयर भाः कुहां वयेवं थुगु समुहया उपसुचक नं म्हिगः दकलय् अप्वः १६ दशमलव ६७ अंकं कुहां वयाः ५३५ दशमलव ५२ अंकय् थ्यन। नापं विकास बैंक समुह ७ दशमलव ५२ अंकं कुहां वयाः ६३९ दशमलव ३ अंकय् थ्यंगु दु। अथे हे फाइनान्स समुह नं विकास बैंक सरह ७ दशमलव ३२ अंकं कुहां वयेवं ६०६ दशमलव ८८ अंकय् थ्यंगु दु ।
मेखे दक्वं समुहया कारोबार कुहां वयाच्वंगु इलय् म्हिगः वीमा समुह छगू जक सामान्य सुधार जुयाः शुन्य दशमलव शुन्य ५ अंकं थहां वनाः ६०६ दशमलव ३५ अंकय् थ्यंगु दु ।
ख्वीनिगू कम्पनीया कारोबारं निगू लाख झिंगुद्वः निसः व नीन्यागू कित्ता शेयर न्याये-मी जुयाः च्यागू करोड पीनिगू लाख प्यद्वः तका दांया कारोबार जुल ।
दकलय् अप्वः छगू लाख खुद्वः खुसः व ख्वीन्हय्गू कित्ता शेयर न्यायेमी जूगु नेपाल शेयर मार्केटस्या प्रमोटर शेयरं दां ल्याखं नं दकलय् अप्वः छगू करोड ग्वीगुद्वः व स्वीद्वः तका दांया कारोबार याःगु दु। मेखे पिपल्स फाइनान्स कम्पनीं दकलय् अप्वः कमे याःगु दुसा माछापुच्छ्रे बैंक लिमिटेडं दकलय् अप्वः द्यापं फःगु दु ।
