माओवादी पाखें स्थानीय निकाय घेराउ
नागरिक सर्वोच्चताया माग पूमवंगु धासें आइतवाः निसें निक्वःगु आन्दोलन शुरु याःगु एनेकपा (माओवादीं) सोमवाः देयन्यंकया स्थानीय निकाय घेराउ याःगु दु ।
सोमवाः सुथं निसें थीथी जिल्लाया स्थानीय निकायलय् भेला जूपिं माओवादी कार्यकर्तातय्सं नाराबाजी यासें स्थानीय निकाय घेराउ याःगु खः । बागदरवारय् च्वंगु येँ महानगरपालिका न्ह्यने प्रदर्शनकारीतय्सं सुथय् च्याताः ईलं निसें नाराबाजी यानाः घेराउ ज्याझ्वः न्ह्याकूगु खः । येँ महानगरपालिकाय् याःगु घेराउया कारणं त्रिपुरेश्वर, भद्रकाली, सुन्धारा, माइतीघर, थापाथलीया यातायात प्रभावित जूगु खः ।
येँ महानगरपालिका, यल उपमहानगरपालिका व ख्वप नगरपालिका लगायत देय्न्यंकया न्यय्च्यागू नगरपालिका व प्यद्वलं मल्याक गविसय् नं माओवादी कार्यकर्तातय्सं राष्ट्रपतिया पलाः भिंकेमाःगु, नागरिक सर्वोच्चता कायम यायेमाःगु व सरकारया विरुद्ध नारावाजी यानाः ज्याकू घेराउ याःगु ख: ।
माओवादी थौं न्हिच्छि स्थानीय निकाय घेराबन्दी यानाः कर्मचारीत्त ज्याकू दुने वनेत पंनेवं अनया दक्वं ज्यात प्रभावित जूगु दु ।
थ्वस्वयां न्ह्यः माओवादीं आइतवाः सनिलय् देय्न्यंक मशास जुलुस पिथनाः निक्वःगू आन्दोलन न्ह्याकूगु खः ।
