अछाम घटनाय् सामुहिक बलत्कार जूगु आयोगया ठहर
अछाम जिल्ला प्रहरी ज्याकूथी मिसा प्रहरीयात थः हे सहकर्मीत पाखें सामुहिक बलात्कार याःगु ठहर राष्ट्रिय मानव अधिकार आयोगं याःगु खः । वंगु मोहनीया नवमी (असोज ११ गते) कुन्हु छम्ह अधिकृत सहितया पुचलं सामुहिक बलत्कार याःगु उजुरी छम्ह मिसा प्रहरीं बीवं उगु उजुरीया आधारय् आयोगं अनुसन्धान याःगु खः ।
आयोगं आइतवाः छगू पत्रकार सम्मेलन यानाः अछाम घटनाय् सामुहिक बलत्कार जूगु निष्पर्ष सहितया प्रतिवेदन सार्वजनिक याःगु दु । स्थलगत अध्ययन लिपाः सार्वजनिक याःगु प्रतिवेदनय् अछाम जिल्ला प्रहरी ज्याकूया खुम्ह वरिष्ठ मिजं सहकर्मीतय्सं चरेश ल्वाकाछ्यानातःगु लाः नका जबरजस्ती बल्तकार याःगु निष्कर्ष पिकाःगु दु ।
आयोगं 'परिस्थितिजन्य प्रमाण' पाखें मिसायात बलत्कार याःगु ठहर जुइगु धासें प्रहरी नियमावली कथं हदहे तकया दण्ड व फौजदारी मुद्दा चले यायेत सरकारयात सिफारिस याःगु दु । नियमावलीलय् हदहे तक दण्ड धाइगु विभागिय कारवाही निसें सेवा अवकास तकया जुइगु धयादिसें आयोग अध्यक्ष केदारनाथ उपाध्यायं नापनापं दोषीयात फौजदारी मुद्दा चले यायेमाःगु धयादिल ।
घटनाय् प्रहरी सहायक निरीक्षक दानिसंह भण्डारी, हवल्दा वीरेन्द्र बम, करवीर थलाल, वीरादत्त बडु, जवान जगदीश पाण्डे व नरिभान महताराया संलग्नता दुगु खनेगु आयोगं धाःगु दु ।
आयोगं ज्याकूया प्रमुख प्रहरी नायव उपरीक्षक छविलाल धमला व निरीक्षक शारदाप्रसाद चौधरीयात नं पीडित मिसाया चरित्रय् न्ह्यसः ल्ह्वंगु व घटनाया अनुसन्धानय् लिच्वः लाइगु कथंया अभिव्यक्ति ब्यूगु धासें विभागीय कारवाही यायेत सिफारिस याःगु दु ।
अथेहे अयोगं भविष्यय् थंज्याःगु घटना जुइ मबीत प्रहरी संगठन दुने मिसा प्रहरीया सुरक्षाया उचित प्रबन्ध यायेगु कथंया आचारसंहिता व आवशयक नीति तर्जुमा यायेत सिफारिस याःगु दु ।
