फोरम पाखें प्रमयात ज्ञापनपौ
सरकार व मधेशी समुदाय दथुइ न्हापा जूगु सम्झौतात कार्यान्वयनया माग यासें मधेशी जनअधिकार फोरमं आइतवाः प्रधानमन्त्री माधवकुमार नेपलायात ज्ञापनपौ लःल्हाःगु दु । प्रमुख प्रतिपक्षी दल एनेकपा (माओवादीं) निक्वःगू आन्दोलन शुरु याःगु न्हि हे मेगू प्रतिपक्षी दल फोरमं माग कार्यान्वयन मजुसाः आन्दोलन यायेगु ख्याच्वः सहित ज्ञापनपौ लःल्हाःगु खः ।
गुंगू बुँदा दुगु उगु ज्ञापन पौलय् थःगु पार्टी नाप जूगु नीनिगू बुँदे व संयुक्त लोकतान्त्रिक मधेशी मोर्चा नाप जूगु च्यागू बुँदे सम्झौता पूर्ण कार्यान्वन यायेत माग याःगु दु । अथेहे मधेश आन्दोलनया ईलय् थःगु पार्टीया कार्यकर्तातय्त लगे जूगु मुद्दा लितकाये माःगु माग याःगु दु ।
उगु ज्ञापनपौलय् हिन्दी भाय्यात सरकारी ज्याखँया भाय् घोषणा यानाः उपराष्ट्रपतियात क्रियाशिलता यायेमाःगु, सरकारं हःगु समावेशी विधेयक तत्काल पारित यायेमाःगु लगायत माग नं न्ह्यथंनातःगु दु ।
फोरमया अध्यक्ष उपेन्द्र यादव, सह अध्यक्ष जयप्रकाश गुप्ता लगायत नेतातय् प्रतिनिधिमण्डल प्रधानमन्त्री निवास बालुवाटर वनाः प्रधानमन्त्री नेपालयात ज्ञापनपौ लःल्हाःगु खः ।
