माओवादी आन्दोलन थनिंनिसें शुरु
येँ (सन्ध्या टाइम्स)/नागरिक सर्वोच्चताया माग यासें ताः इलंनिसें आन्दोलन याना वयाच्वंगु माओवादीं थनिंनिसें थःपिनि कडा आन्दोलन न्ह्याकीगु जूगु दु ।
आन्दोलनया न्हापांगु ज्याझ्वः कथं थौं देय्न्यंकं मशाल जुलुस प्रदर्शन यायेत्यंगु दु। थौं येँ, यल ख्वप लगायत न्हय्न्यागुलिं जिल्लाय् पौने ६ बजे मशाल जुलुस पिकाइगु ज्याझ्वः दु ।
थ्व झ्वलय् येँ न्याथासं मशाल जुलुस पिकाइगु ग्वसाः दु। थनया पुलांगु बसपार्कं मजदुरपाखें, दरवारमार्गं विद्यार्थीपाखें, महाबौद्धं गणतान्त्रिक मञ्च व बुद्धिजीवीपाखें मशाल जुलुस पिकाइगु ग्वसाः दु ।
उगु मशाल जुलुस बागबजाः, पुतली सतक, न्हूसतक जुयाः खुल्लामञ्चय् क्वचाइ। थुगु जुलुसय् शीर्ष नेतातय्सं ब्वति काइगु खँ माओवादी नेवाः राज्य समितिं धाःगु दु ।
अथे हे यलया मंगलं पिहां वइगु जुलुस पूच्वय् थ्यंकाः क्वचाइसा ख्वपय् सुर्यमढीं पिहां वइगु जुलुस सिद्धपुखुली थ्यंकाः क्वचायेकेगु ज्याझ्वः दयेकातःगु दु। थौंया मशाल जुलुस क्वचायेधुंकाः उकी छ्यःगु मशालया मि स्यायेत व मि स्याःगु थाय् सफा यायेत माओवादीं दमकल प्रयोग याइगु खँ नं धाःगु दु ।
आन्दोलनयात संयमित जुयाः न्ह्याकेत माओवादीं कार्यकर्तातय्त निर्देशन बियातःगु दु। आन्दोलनय् घुसपैठ पनेत व शान्तिपूर्ण रुपं ज्याझ्वः न्ह्याकेत नं कार्यकर्तायात निर्देशन बिउगु दु। आन्दोलनया नापनापं वार्ता नं जारी जुयाच्वनीगु खँ पार्टीं धाःगु दु ।
