विश्व नेवाः सम्मेलन जुइगु
येँ (सन्ध्या टाइम्स)/नेवाः विश्व सम्मेलन यायेत नेपालभाषा मंकाः खलःया छ्याञ्जे नरेशवीर शाक्यया संयोजकत्वय् नेवाः विश्व सम्मेलन तयारी समिति नीस्वंगु दु। विश्व न्यंकंया नेवाःतय्त छगू सुत्रय् हयाः नेवाःतय्गु व्यापक हकहित, भाषा, साहित्य, संस्कृतिया संरक्षण तातुनाः थ्व सम्मेलन यायेत्यंगु खः ।
तयारी समितिइ नेपाःपाखें अर्थ तुलाधर कजि, महेश्वर श्रेष्ठ दांभरि, सुरेश प्रधान, सुजीव बज्राचार्य, ज्योति नकर्मी, विमल ताम्राकार, कुमार श्रेष्ठ, रमेशरत्न ताम्राकार च्वनादीगु दु। उकथं हे दिव्यरत्न हाडा (अमेरिका), राजेन्द्र श्रेष्ठ (अमेरिका), रविन्द्रमान श्रेष्ठ (बेल्जियम), रजनी प्रधान (बेल्जियम), नीलेन्द्रराज श्रेष्ठ (जर्मनी), भीम उदास (लेसेथो), देवकाजी डंगोल (कतार), केशवलाल महर्जन (जापान), प्रीतम श्रेष्ठ (हङकङ), घनश्याम राजभण्डारी (मस्को) दुजः जुयादीगु दु। तयारी समितिं याकनं हे थःपिनि ज्याझ्वः पित बीत्यंगु दु ।
नकतिनि क्वचाःगु एनआरएन सम्मेलनय् ब्वति काःवःपिं नेवाः प्रतिनिधिनाप व्यापक सहलह जुयाः विश्व नेवाः सम्मेलन तयारी तदर्थ समिति नीस्वंगु खः। सहलह मुँज्याय् २५ गू देय्या नेवाः प्रतिनिधितय्सं ब्वति काःगु खः ।
