छवाःया नेप्से २० अंकं क्वय्
येँ (सन्ध्या टाइम्स)/नेपाल स्टक एक्सचेन्जय् थ्व वालय् न्यान्हुयंकं शेयर कारोबार जूगु दु। थ्व न्यान्हुया दुने जूगु ग्वीन्यागू कम्पनीया ४५४४ गू कारोबारं नीन्हय्गू करोड ख्वीस्वंगू लाख न्यय्खुद्वः तका दांया बराबरया प्यंगू लाख ग्वीनिद्वः व स्वसः कित्ता शेयर न्याये-मी जुल ।
वंगु वालय् स्टक एक्सचेन्जय् निन्हु जक जूगु शेयर कारोबारं ख्वीन्हय्गू कम्पनीया १४६७ कारोबारं न्हय्गू करोड स्वीनिगू लाख स्वीनिद्वः तका दां बराबरया छगू लाख नीछद्वः व गुसः कित्ता शेयर न्याये-मी जूगु खः। वंगु वाः स्वन्ति नखःया कारणं बजाः बन्द जुइवं निन्हु जक शेयर बजाः चाःगु खः ।
थ्व छवाःया दुने जूगु शेयर कारोबारं नेप्से २१ दशमलव २४ अंकं कुहां वंगु दु। न्हापांगु न्हि ५९९ दशमलव ४३ अंकं शुरु जूगु शेयर कारोबार वाःया लिपांगु न्हि ५७८ दशमलव १९ अंकय् थ्यंकाः बजाः बन्द जूगु खः ।
स्टक एक्सचेन्जं बिउगु जानकारी कथं कूल कारोबारय् 'क' वर्गय् लाःगु झिंन्हय्गू करोड चय् न्यागू लाख तका दांया कारोबार जूगु दु। थ्व नेप्सेय् जूगु कूल कारोबारया ६४ दशमलव ६१ प्रतिशत खः ।
'क' वर्गया कारोबार मापन याइगु सेन्सेटिभ नं वाःया न्हापांगु न्हिया तुलनाय् ७ दशमलव १६ अंकं कुहां वयाः १४४ दशमलव ५४ अंकय् थ्यंगु दु ।
थुगु छवाःया दुने जूगु कारोबारय् स्वंगू करोड झिंछगू लाख दां व न्हय्खद्वः कित्ता शेयर कारोबार याःगु लिधंसाय् किष्ट बैंक अथे हे संख्याया लिधंसाय् न्यासः व ख्वीखुगु कारोबार याःगु पशुपति डेभलपमेण्ट बैंक दकलय् न्ह्यःने लाःगु दु।
थ्व वालय् सिभिल मर्चेण्ट, पिपल्स फाइनान्स, पोखार पोखरा फाइनान्स व नारायणी डेभलपमेण्ट बैंकया हकप्रद शेयर, सनराइज बैंक, प्राइम कमर्सियल बैंक व भिवोर विकास बैंकया साधारण शेयर व निर्धन उत्थान बैंकया बोनस शेयर स्टक एक्सचेन्जय् कारोबारया निंतिं सुचीकृत जूगु दु ।
