सत्ता प्राप्तिया निंतिं माओवादी आन्दोलन : प्रम
प्रधानमन्त्री माधवकुमार नेपालं नागरिक सर्वोच्चताया नांमय् माओवादीं थःगु सर्वोच्चता लादे यायेत स्वःगु द्वपं बियादीगु दु । वयेकलं माओवादीं थःम्ह हे थ:गु नेतृत्व या:गु सरकार गठन यायेगु धकाः धयाच्वंगुलिं माओवादी आन्दोलन सत्ताया निंतिं जक जूगु धयादिल ।
लोकतान्त्रिक मधेशी संगठनं शनिवाः येँ याःगु छगू ज्याझ्वलय् वयेकलं माओवादीं धा:गु नागरिक सर्वोच्चता माओवादी नेतृत्वया सरकार व माओवादी सर्वोच्चता वाहेक मेगू छुं मखु धयादिल । वयेकलं माओवादी सरकारया राजीनामा लिपाः वैधानिक रुपं सरकार गठन जूगु धयादिसें प्रधानमन्त्री चयन यायेगु ईलय् प्रतिस्प्रर्धा यायेत आँट मयासें बिस्यूवंगुलिं आः थःगु सरकार गठन यायेगु खँ ल्हाये मल्वःगु धयादिल ।
वयेकलं माओवादी पाखें जनता असुरक्षित जुसाः सरकारं आवश्यक पलाः ल्ह्वनीगु धयादिल । वयेकलं नियम कानुन विरुद्ध वनिपिंत सरकारं पनीगु धयादिसें हिंसात्मक तरिकां सुं नं न्ह्यावंसाः सरकार सुंमक मच्वनीगु धयादिल ।
