सरकारय् वसाः माओवादीयात सम्मानजनक थाय् बीगु : ओली
नेकपा (एमाले)या वरिष्ठ नेता केपी शर्मा ओलीं माओवादीं आन्दोलन त्वःता सरकारय् वसाः सम्मानजनक थाय् बीगू खँ धयादीगु दु ।
एमालेया विघटित येँ जिल्ला कमिटीं शनिवाः नेपाल संवत् ११३० न्हूदँया लसताय् याःगु तुच्चाः ज्याझ्वलय् न्ववानादिसें वयेकलं माओवादीयात आन्दोलन दिकाः सरकारय् वयेत इनाप यानादिसें सरकारय् ब्वति कासाः सम्मानजनक थाय् बीगू खँ धयादिल ।
वयेकलं माओवादीया लिप्पांगु गतिविधिं माओवादी प्रति हे आशंका ब्वलंकूगु धयादिसें आन्दोलनय् जनता मवनीगु नं दाबी यानादिल । माओवादीं कानुन ल्हातेय् काइगु कथं न्ह्या वनाच्वंगु दाबी यानादिसें वयेकलं उकीयात नियन्त्रणय् कायेत सरकार कडा रुपं प्रस्तुत जुइमाःगु बिचाः प्वंकादिल ।
एमालेया अध्यक्ष झलनाथ खनाल व नेता ओली दथुइ तच्वःया वंगु विवादया कारणं ओली पक्षय् दुगु विघटित जिल्ला कमिटीं शनिवाः तुच्चाःया ग्वसाःग्वःगु खसाः अध्यक्ष खनाल पक्षं शुक्रवाः हे तुच्चाः ज्याझ्वः याःगु खः ।
शुक्रवाःया तुच्चाय् ओली पक्षया नेतातय् उपस्थिति मदुगु खसाः शनिवाःया तुच्चाःय् खनाल पक्ष नेता अनुपस्थित जुयादीगु खः । एमालेया वरिष्ठ नेता नापं प्रधानमन्त्री माधवकुमार नेपाल धाःसा निगूलिं पक्षया ज्याझ्वलय् उपस्थित जुयामदी ।
